Bilim jáne ǵylym salasynda sapany qamtamasyz etý komıtetin QR Bilim jáne ǵylym mınıstrligi quramynan shyǵarý kerek. Mundaı usynysty Astana Garden School mektebiniń negizin qalaýshy Nurmuhamed Dosybaev ADAL BILIM alańynda aıtty, dep habarlaıdy «Adyrna» tilshisi.
Spıkerdiń aıtýy boıynsha, menedjment qaǵıdasynda bilim salasynyń sapaly bolýy úshin mindetterdiń oryndalýy men olardy qadaǵalaý jumysy mańyzdy ról atqarady. Osyǵan oraı Nurmuhamed Dosybaev elimizde atalǵan máseleni sheshýdiń jolyn usyndy.
«Bilim jáne ǵylym salasynda sapany qamtamasyz etý komıtetin mınıstrliktiń quramynan shyǵarý kerek. Tipti Úkimettiń quramynan shyǵarsa da artyq bolmaıdy. Sol kezde elimizdegi barlyq mekteptiń sapasyn táýelsiz baqylaı alamyz. Mysaly Anglııadamundaı mekeme - memlekettik emes, qoǵamdyq organ, biraq memleket tarapynan qarjylandyrylady. Sebebi ol mınıstrlikke baǵyshynty bolsa, tıimdi jumys istemeıdi», - deıdi spıker.
Sondaı-aq Astana Garden School mektebiniń negizin qalaýshysy mekteptegi menedjmenttiń álsiz bolýyna kooperatıvti basqarý qaǵıdalarynyń bolmaýy da sebep bolatynyn alǵa tartty. Qazaqstanda dırektorlardy akademııalyq turǵyda daıyndaǵanymen, menedjer bolýǵa úıretpeıtinin aıtady. Efır barysynda spıker halyqaralyq tájirıbede dırektorlar men qamqorshylyq keńestiń jumysy qalaı júrgiziletini týraly sóz qozǵady.
«Mektepte dırektor atqarýshy organnyń basshysy bolyp sanalady. Halyqaralyq tájirıbege súıensek, mektepte basqarýshy jáne oryndaýshy organ bar. Sheteldik memlekettik mektepterde basqarýshy organ – qamqorshylyq keńes. Bizde basqarýshy organ – bilim basqarmasy. Iaǵnı elimizde qamqorshylyq keńestiń áli de quzyrettiligi joq. Anglııada mektep dırektory toqsan saıyn qamqorshylyq keńestiń aldynda esep beredi. Al bizdiń qamqorshylyq keńestiń quramy da nashar. Olardyń quramyna sapaly menedjerler kirip, úsh komıtet jumys isteýi kerek: aýdıt jáne táýekelderdi basqarý komıteti, strategııalyq damý jónindegi komıtet, mamandarmen jumys jáne olardy yntalandyrý boıynsha komıtet. Qamqorshylyq keńestiń quramyndaǵy adamdar osylardyń bárine mán berip, tegin qyzmet etýi qajet. Olaı jumys jasaýy úshin Bilim jáne ǵylym mınıstrliginen sondaı baǵyt-baǵdar beretin qujat júzinde daıyndalyp, qarjy bólinýi tıis»,- dedi Nurmuhamed Dosybaev.
«Adyrna» ulttyq portaly
