«Aıaǵyńdy syndyramyn, qaq shekeńnen atamyn»,- deıdi tarazdyq mektep basshysy

2570

Tarazdyq ustazdar mektep dırektoryna shara qoldanýdy suraıdy. Jambyl oblysynda bir top muǵalim mektep qabyrǵasynda moraldyq-psıhologııalyq jaǵdaıdyń qıyndaǵanyna shaǵymdandy. Taraz qalasy bilim bóliminiń «№36 orta mektep» kommýnaldyq memlekettik mekemesiniń qyzmetkerleri mektep dırektory Gúljahan Abdreshovaǵa qatysty shara qoldanýdy suraıdy dep jazady «Adyrna» ulttyq portaly  Azattyq Rýhy aqparat agenttigine silteme jasap.

Agenttik redakııasyna habarlasqan ustazdar mektepte jóndeý jumystaryna qarajat jınaý, basylymdarǵa májbúrlep jazdyrý, mekteptiń qural-jabdyqtaryn muǵalimderdiń satyp alýyna ıtermeleý derekteri baryn aıtty. Aryzdanýshylar hat sońynda óz esimderin atamaýdy suraǵan.

Osy mektepte tarıh páninen 16 jyldan beri sabaq beretin muǵalim mektep basshysynyń dórekiligi men aqshany zańsyz jınaýǵa yqpal etip otyrǵanyn aıtady. Ol mektep dırektorlyǵyna 2019 jyly qazan aıynda taǵaıyndalǵan Gúljahan Abdreshovanyń adamnyń jeke basyn qorlaý, ádepsiz sózder aıtý jáne jumys tártibinen tys kezeńde tapsyrmalar beretinin alǵa tartady.

«Qazir WhatsApp messendjeri arqyly jumys isteıtin zaman boldy ǵoı. Mektep dırektory sabaq oqytyp otyrsań da, sabaqtan tys ýaqytta da ortaq chatta tynyshtyq bermeıdi. Anany alyp kel, mynany alyp kel deıdi. Sosyn jekeńe shyǵyp aıqaıǵa basady. Biz balaǵa onlaın rejımde sabaq ótip otyrǵanda, basqa eshnársege alańdamaýymyz kerek. Alaıda, dırektor Abdreshova Gúljahan Esenovna ony eskermeıdi. Jumys ýaqyty tańǵy 8:00-den keshki 20:00-ge deıin ekeni belgili. Biraq ol kisi túngi 22:00-den keıin de, tipti 23:50-de jekege habarlama jazyp, habarlamany aldyń ba, qolyńdy kóter, eki tapsyrma berilse, eki ret kóter dep dórekilik kórsetedi», - deıdi pedagog.

Pán muǵalimi bıyl Ybyraı Altynsarın atyndaǵy tósbelgige usynylǵanyn aıtady. Ol baıqaýǵa mektep ádiskeriniń nusqaýymen qujattar tapsyryp, medalge ıe bolǵan. Alaıda, osy úshin mektep basshysy qaramaǵyndaǵylardy balaǵattap, aýyr sózder aıtypty.

«Saýatsyz, týpoısyńdar, nege baıqaýǵa qatysasyńdar?» dedi. Osy oqıǵadan soń qan qysymym kóterilip, jedel járdem shaqyrttym. Dárigerler ystyq ýkol saldy. Birneshe kún aýyryp, sosyn aqyry quladym. Júıkem syr berip, úıde em alýǵa týra keldi», - deıdi aryz ıesi.

Dırektordyń beıádep sózderi men anaıylyǵyn aıtyp bilim bólimine shaǵymdanǵan muǵalimder bılikten esh shara bolmady deıdi.

«Qazir qashyqtan oqyp jatyrmyz, elde pandemııa jaǵdaıy, eshkimge ońaı emes. Bizdiń mektepke bul dırektor 2019 jyly qazan aıynda kelgen. Mádenıetten, etıkadan jurdaı. Muny bar jaýapkershilikpen aıta alamyn jáne mektepte barlyq muǵalim kýálik beredi. «Qaq shekeden atamyn, býhgalterııaǵa barsań aıaǵyńdy syndyramyn, shashyńdy julamyn, osy jerde qulap ólip qal, saýatsyz, týpoı» degen sózder biz úshin úırenshikti. Biz bul týraly qalalyq bilim bólimine shaǵym jazǵanbyz, osy aıtylǵandardyń barlyǵyn sol jerde kórsettik», - deıdi bizge telefon arqyly habarlasqan muǵalim.   

Bilim ornyndaǵy eń daýly másele – kabınetterge jóndeý jumystary úshin qarjy jınaý. Jyl basynan beri tarıh, matematıka jáne orys tili kabınetterin jóndeý úshin ár muǵalim 20 myń teńgeden qarajat jumsapty. Mektep basshysy bul bastama árkimniń óz erkimen istelýi kerek dep alady da, artynan orynbasaryn jumsap, mektep muǵalimderine boıaýdan bastap, jóndeýge qajetti qurylys materıaldaryna deıin aldyrady eken.

«Men qalalyq sybaılas jemqorlyqqa qarsy mekemege aryz jazdym, ol jerde pán muǵalimderiniń barlyǵyna mektepishilik jóndeý jumystaryna qarajat jınaǵanyn dáleldedik. Tarıh páni kabınetine osy aryzdan soń memleketten bólingen qarjyǵa jóndeý júrgizdi. Orys tili, matermatıka sııaqty kabınetterge muǵalimder ár qaısysy 20 myń teńgeden qarjy jınady. Al mekteptiń eden jýýshylary 5 500 teńgeden aqy alyp, ol kabınetterdi jóndedi. Sosyn Antıkorda jınalys ótip, ol jerde mektepke bala sanyna qaraı qarjy bólinedi, soǵan ǵana jóndeý júrgizlýi tıis. Ata-ana nemese muǵalimderden qarjy jınaýǵa tyıym salynǵan dep Antıkor mamandary kórsetip berdi, bizdiń mektepke jóndeýge 400 myń teńge qarastyrylǵan. Al muǵalimder jınaǵan aqshaǵa alynǵan qurylys materıaldary qaıda, boıaýlar qaıda jaǵyldy degen suraqtar ashyq qaldy», - dep shaǵymdandy ustazdar.

«Mektep basshysy eshkimnen qoryqpaıdy, bizden zańsyz jınaǵan qarajatty qaıtaratyn oıy joq. Biz, muǵalimder, osy kúnge deıin gazet-jýrnaldarǵa erkimizden tys jazylamyz. Kimde saǵaty kóp, soǵan qymbat basylymdarǵa, «Egemen Qazaqstan» jáne «Aq Jol» gazetine 10 myń teńgege jazylýǵa nusqaý beredi. Al saǵaty az muǵalimderdi «Jambyl», «Taraz» degen 4500 teńgelik basylymdarǵa jazdyrtady», - deıdi muǵalimder.

Ózin orys til páni muǵalimi dep tanystyrǵan azamat mekteptegi birneshe zańsyzdyqqa toqtaldy. Onyń aıtýynsha byltyr qarasha aıynda muǵalimder «Altest» júıesimen attestaııadan ótken, sol kezde portfolıo tapsyrady. Mektep dırektory testten ótkenderdiń barlyǵyna 2 qoraptan A4 formatyndaǵy qaǵaz satyp ákelýge tapsyrma bergen kórinedi. Ár qoraptyń baǵasy – 1400 teńgeden. Barlyǵy 20-dan astam muǵalim attestaııadan ótken.

«Mektep dırektorynyń orynbasary Gúlnár Bashenova pán muǵalimderine shyǵyp, aqsha jınaýdy mindetteıdi. Sosyn kim qaı kabınetke jóndeý jumystaryn júrgizý kerek ekenin bólip beredi. Bizdiń №36 mektepte negizgi pán kabınetterin muǵalimder óz kúshimen jasady. Bazardan baryp boıaý satyp aldyq, odan tys, barlyq qurylys saımanyn qosa satyp aldyq. Al, jóndeýge mekteptiń tehnıkalyq qyzmetkerleri jumyldyryldy. Odan tys, olardyń eńbekterine dep taǵy 5 myń teńgeni muǵalimder tóledik. Sonda bir kabınettiń jóndeýine 19 500-20 000 teńge jumsaldy. Abdreshovany Tarazda «Gestapo» dep ataıdy. Ol bul sózdi ózi de aıtady. Ol qalalyq bilim bóliminde ádisker bolyp istegen, №27 mektepte dırektor bolǵan. Pedagogıkalyq ortada tanymal. Kekshil adam, sondyqtan men óz atymdy jasyryp qalýǵa májbúrmin. Qorqamyn», - deıdi №36 mekteptiń orys tili páni muǵalimi.

Azattyq Rýhy muǵalimderdiń shaǵymyna qatysty Taraz qalasy bilim bóliminiń «№36 orta mektep» kommýnaldyq memlekettik mekemesiniń dırektory Gúljahan Abdreshovanyń pikirin suradyq. Bilim mekemesiniń basshysy mundaı shaǵymdardyń baryn biletinin aıtty. Biraq anonımdi aryzdardyń dáleli bolsa jaýap berýge daıyn ekenin jáne óziniń de osy máselege qatysty quqyq qorǵaý organdaryna aryzdanatynyn málimdedi.

«Men bir-aq nárseni aıtamyn. Eger sol muǵalimderdiń qolynda dálelder bolsa, sotqa júginsin de, jazalasyn. Biraq, aryzdaryn olar anonım túrinde jazady, taratady. Qazaqstan Respýblıkasynyń jeke qaralymdar týraly arnaıy zańy bar, sol zańnyń 5-shi babynda kórsetilgen. Eger jeke qaralym anonımdi túrde tússe, qaralmaýy kerek. Biraq bul birneshe ret qaıtalanyp turǵan soń, zań oryndaryna shaǵymdanyp, advokatpen kelistim. Ol maǵan quqyq qorǵaý organdaryna aryz jazýymdy surady. Erteń osy máselemen aınalyspaqshymyn. Men qasyqtap jınaǵan abyroıymdy shelektep tókkim kelmeıdi. Ózim «arym – janymnyń sadaǵasy» dep ómir súretin adammyn. Sondyqtan aryzdanǵan adamdardy izdep tabýǵa kirisemin. Ujymdaǵylardyń jeke basyna tıispeımin. Ókpem joq, árbir ujymda ondaı bir-eki adam bolady. Eger sol aryzdanǵan adamdardyń qolynda dálel bolsa, týra men sııaqty óz quqyǵyn qorǵasyn», - deıdi Gúljahan Abdreshova.

Taraz qalasy ákimdigi bilim bóliminiń basshysy Saıahat Eseev aryzdardyń qaralyp, tıisti shara qoldanǵanyn jetkizdi. Alaıda, mektep dırektory Gúljahan Abdreshova bilim bóliminiń 10.11.2020 jylǵy №922 buıryǵymen kelispeıtinin aıtady.

«Aryzdy qarastyrý qorytyndysy boıynsha basshylyq pen baqylaýdy álsiretkeni jáne ujymdaǵy psıhologııalyq moraldyq ahýaldyń tómendeýine jol bergeni úshin №36 orta mektep dırektory G.Abdreshovaǵa «sógis» túrindegi tártiptik jaza qoldanyldy. Biraq bul bizdiń ishki sharýamyz. Ol jerde arnaıy zerdeleý toby jumys júrgizdi. Tikeleı baǵynyshty mekeme bolǵan soń, jaza qoldanyldy. Buıryqqa ózim qol qoıdym. Aryzdar keledi. Bizge atyn kórsetpeıdi, túsin tústemeıdi. Jeke jáne zańdy tulǵalardyń ótinishin qaraý tártibi boıynsha búrkemelengen aryzdar qaralmaýy kerek. Biraq saıası-áleýmettik ahýaldy turaqtandyrý úshin bilim bólimine berilgen arnaıy nusqaýlar bar. Sonyń aıasynda ishki sheshimmen ol mektepte bolyp jatqan jaǵdaılarǵa beı-jaı qaraǵan joqpyz. Baryp, qarap, kórip muǵalim-ustazdardyń pikirin tyńdap, ózimiz zerdeleý jumystaryn júrgizdik», - dedi Taraz qalasy ákimdigi bilim bóliminiń basshysy Saıahat Eseev.

Redakııaǵa joldanǵan hatta muǵalimder: «Taraz qalasy №36 orta mektebinde dırektor óz qyzmetin asyra paıdalanyp, zańsyz áreketterge barýyn toqtatsyn. Osy kúnge deıin zańsyz jınalǵan qarajattar qaıtarylsyn. Pán muǵalimderi balaǵa bilim men tárbıe berý isimen aınalysýy kerek. Al sharýashylyq nemese ózge de mektep jumystarymen aınalysatyn arnaıy qyzmetkerler bar. Quzyrly organdarǵa hatta keltirilgen derekterdi berýge jáne tıisti dálelderdi usynýǵa daıynbyz», degen talaptaryn jetkizip otyr.

Rıshat ASQARBEKULY.

Pikirler
Redakııa tańdaýy