Taldy auylynyŋ uchaskelık inspektory qoǧamdyq tärtıptı qamtamasyz etumen qatar, auyl jastaryn sportqa baulityn zal aşty
Tütını tüzu ūşqan Taldy auylynyŋ tarihy sonau 1968 jyldan bastau alady. Bügınde mūnda 500-den astam tūrǧyn tatu-tättı ǧūmyr keşıp, negızınen mal şaruaşylyǧy men egınşılıktı käsıp etıp otyr. Auyldaǧy qoǧamdyq qauıpsızdıktı qamtamasyz etıp, tūrǧyndardyŋ tynyştyǧyn küzetıp jürgenderdıŋ bırı – Şet audandyq polisiia bölımınıŋ uchaskelık polisiia inspektory, polisiia kapitany Mūhamedqali Saduaqasov.
Būl qyzmet oǧan jai ǧana jūmys emes. Öitkenı Taldy – onyŋ kındık qany tamǧan tuǧan jerı.
Mūhamedqali Saduaqasov ışkı ıster organdaryndaǧy eŋbek jolyn 2012 jyly jyldam qimyldaityn arnaiy jasaq bölımınen bastaǧan. Biyl nauryz aiynan bastap tuǧan auylyna uchaskelık polisiia inspektory bolyp oralyp, el tynyştyǧyn qamtamasyz etu ısıne bılek sybana kırıstı.
Tuǧan jerge tuyn tıkken tärtıp saqşysy eŋ aldymen auyldyŋ ahualyn zerdelep, jergılıktı bilık ökılderı jäne auyl aqsaqaldarymen bırlesıp, qoǧamdyq tärtıptı nyǧaituǧa baǧyttalǧan jūmystardy qolǧa aldy.
– Auyldyq jerdegı basty mäselelerdıŋ bırı – mal ūrlyǧynyŋ aldyn alu. Osy baǧytta jergılıktı atqaruşy bilık ökılderımen bırqatar jūmystar atqardyq. Qazırgı taŋda būl baǧyttaǧy jūmys jolǧa qoiyldy. Sonymen qatar auyl tūrǧyndarynyŋ auyzbırşılıgınıŋ arqasynda Taldy ışımdıksız auyl atandy, – deidı uchaskelık polisiia inspektory Mūhamedqali Saduaqasov.
Polisiia kapitanynyŋ aituynşa, auyldaǧy tärtıptıŋ saqtaluy tek qūqyq būzuşylyqtyŋ aldyn alumen şektelmeidı. Äsırese jastardyŋ bos uaqytyn tiımdı ūiymdastyru – qauıpsız qoǧam qalyptastyrudyŋ maŋyzdy tetıgı.
Osyny eskergen uchaskelık inspektor Taldy auyldyq okrugınıŋ äkımıne ūsynys aityp, bos tūrǧan üidı jastardyŋ sportpen şūǧyldanuyna arnalǧan jattyǧu zalyna ainaldyrudy qolǧa alǧan.
Özı jauyngerlık sambodan sport şeberı bolǧan Mūhamedqali Saduaqasov endı jinaǧan täjıribesın auyl balalaryna üiretudı maqsat etıp otyr.
– Özım jauyngerlık sambodan sport şeberımın. Sondyqtan bılgenımdı jastarǧa üiretıp, olardyŋ bos uaqytyn tiımdı ötkızuıne mümkındık jasaǧym keldı. Bala tärbiesıne arnalǧan sport zalyn aşu – köpten bergı armanym edı. Bügınde sol armanymdy jüzege asyryp jatyrmyn. Aldaǧy uaqytta osy jerden eldıŋ tynyştyǧyn küzetetın, zaŋ men tärtıptı tu etetın jastar şyqsa, eŋbegımnıŋ aqtalǧany, – deidı ol.
Jaŋa sport zaldyŋ aşylu saltanatyna Qaraǧandy oblysy Polisiia departamentı men audandyq polisiia bölımınıŋ basşylyǧy, audan äkımı, auyl aqsaqaldary men tūrǧyndar qatysty.
Taldy auyldyq okrugınıŋ äkımı Nūrlan Abjanov būl bastamanyŋ auyl jastary üşın maŋyzy zor ekenın atap öttı.
– Osydan ekı-üş ai būryn auyldyŋ uchaskelık polisiia inspektory Mūhamedqali Saduaqasov jastardy sportqa baulyp, olardyŋ talabyn ūştaityn zal qajet ekenın aityp, ūsynys bıldırdı. Bız būl bastamany qoldadyq. Bügın sol jūmystyŋ nätijesınde sport zalyn aşyp otyrmyz. Būl – polisiia tarapynan balalardyŋ bolaşaǧyna körsetılgen ülken qoldau. Osy bastamany jüzege asyruǧa atsalysqan polisiia bölımınıŋ basşylyǧyna jäne Polisiia departamentıne alǧysymdy bıldıremın, – dedı auyl äkımı.
Qyzmet babynda jürıp, talai bairaqty bäsekede top jarǧan tärtıp saqşysynyŋ endıgı maqsaty – özı aşqan sport zalynda jattyqqan är balanyŋ biıkten körınuı.
Al jaŋa zaldyŋ aşyluyna kuä bolǧan auyl jastarynyŋ jüzınen quanyş pen ümıt baiqaldy.
– Auylymyzǧa Mūhamedqali aǧamyz qyzmet babymen auysyp kelgelı berı Taldy ışımdıksız auyl atandy. Bügın jastarǧa arnalǧan sport zaldyŋ aşylyp jatqanyna da quanyp otyrmyz. Osyndai bastamamen auylymyzǧa eŋbek etetın azamattar köp bolsa eken, – deidı auyl tūrǧyny Aidar Qamiev.
Tuǧan jerıne qyzmet etu – elge qyzmet etudıŋ eŋ biık ülgısı. Al qoǧamdyq tärtıptı qamtamasyz etudı jastardyŋ tärbiesımen ūştastyrǧan Mūhamedqali Saduaqasov üşın poliseilık mındet pen azamattyq paryzdyŋ tüiıser tūsy da osy.
