Qostanaı oblysy Rýdnyı qalasynyń ákimi Qýandyq Ispergenov Instagram jelisindegi resmı paraqshasynda qansha jalaqy alatynyn aıtty, dep habarlaıdy «Adyrna» ulttyq portaly.
«Kóptegen adamdar meniń jalaqym men otbasymnyń turǵylyqty jerine qyzyǵýshylyq tanytady. Buǵan deıin habarlaǵanymdaı, óz otbasymdy Rýdnyı qalasyna kóshirdim jáne biz 20-shy shaǵyn aýdanda turamyz. Meniń jalaqym mindetti aýdarymdardan keıin 390 myń teńgeden sál asady»,-dep jazdy ol.
Sondaı-aq, ákim tártip pen tazalyq mádenıeti týraly da oı qozǵady.
«Kóp páterli úıde turǵandyqtan, qoqys polıgondary týraly bilemin. Tańerteń jáne keshke maǵan jaqyn mańdaǵy aýlalardy aralap júrip, qoqys jáshikteriniń bos ekenine, al oǵan jaqyn jerde qoqys úıindileri jatqanyna tań qalamyn. Árıne, kez kelgen mekemeni kinálaý ońaı, biraq tazalyqty ár turǵyn ózinen jáne otbasynan bastaýy kerek dep oılaımyn. Eger balalar qoqystardy konteınerge jetkizbese, onda siz ony úıde úıretińiz. Tazalyq qoqystan tazalanǵan jerde emes, qoqys tastalmaǵan jerde»,-dep sózin qorytyndylady Ispergenov.
«Adyrna» ulttyq portaly
