Shymkent qalasyndaǵy memlekettik organ basshylary megapolıs turǵyndaryn aılyq jalaqylarymen tanystyrýda. Atalǵan akııa «Shymkent-adaldyq alańy» jobalyq keńsesiniń bastamasymen qolǵa alynyp, «Jemqorlyq bizge jat» dep ataldy. Bul týraly Shymkent qalalyq Sybaılas jemqorlyqqa qarsy departamenttiń baspasóz qyzmetine silteme jasap no-comment.kz habarlady.
Atalǵan sharanyń negizgi maqsaty - memlekettik organdardyń basshylaryn parasattylyq jáne ashyqtyq qaǵıdattaryn ustanýǵa shaqyrý bolyp tabylady.
«Akııany memlekettik organ basshylarymen qatar, sport, densaýlyq saqtaý, bilim salasynyń jetekshileri qoldap, jalaqylarymen qatar jemqorlyqtyń aldyn alý maqsatynda atqarylǵan jumystardan da habardar etýde. Akııa qorytyndysymen memlekettik organdar basshylarynyń ashyqtyǵyna baǵa beriletin bolady» - deıdi «Shymkent-adaldyq alańy» jobalyq keńsesiniń basshysy Janı Qambar.
«Jemqorlyq bizge jat» akııasy aıasynda alǵash bolyp jalaqylarynan habardar etken Abaı aýdanynyń ákimi Buharbaı Parmanov 680 myń teńge alatynyn habarlasa, Ál-Farabı aýdanynyń ákimi Ǵabıt Máýlenqulov 550 myń teńgeni quraıtynyn jetkizdi.
Al,qalalyq tótenshe jaǵdaılar departamentiniń basshysy Nurbolat Derbisov 546 myń, Eńbek,áleýmettik qorǵaý jáne kóshi-qon departamenti basshysynyń m.a. Tórehan Daýytov 246 myń, Ál-Farabı aýdanynyń memlekettik kirister basqarmasynyń basshysy Baǵdaýlet Ashenov 153 myń, Kórkem gımnastıkadan QR Ulttyq quramasynyń bas bapkeri Álııa Júsipova 250 myń, Dıagnostıkalyq ortalyǵynyń dırektory Sholpan Myrzahmetova 330 myń, №1 qalalyq klınıkalyq aýrýhanasy bas dárigeriniń orynbasary Talǵat Shaýenov 200 myń, «Daryn» ortalyǵynyń dırektory 210 myń teńge alatynyn jarııalady.
«Aldaǵy ýaqytta basqa da memlekettik mekemelerdiń basshylarynyń aılyq jalaqylarymen qatar, jemqorlyqtyń aldyn alý maqsatynda atqarǵan jumystarymen tanystyratyn bolamyz» - deıdi J.Qambar.
Foto ashyq derekkózden alyndy.
