Búgin Shymkent qalasynyń ákimi Murat Áıtenov qaladaǵy jol-kólik ınfraqurylymyn damytý baǵytynda atqarylyp jatqan jumystardyń barysymen tanysty.
Shahar basshysy, aldymen, A-2 aınalma jolyndaǵy Badam ózeniniń ústinen ótetin kópirdi qaıta qurý jumystarymen tanysty. Bul jumys 2018 jyldyń qazan aıynda bastalǵan. Jobanyń jalpy quny 1 mıllıard 916.3 mıllıon teńge. Sonyń 1 mıllıard 167 mıllıony bıylǵy jyly bólingen.
Kópir qarasha aıynda paıdalanýǵa beriledi. Keńeıip, jańarǵan kópirdiń uzyndyǵy — 144 metr, eni — 28,2 metrdi quraıtyn bolady.
—Shymkenttegi magıstraldy joldar táýligine 20 - 35 myń avtokólik ótkize alady. Al, búginde naqty kórsetkish 50-70 myń avtokólik nemese eki ese kóp. Sondyqtan biz jol-kólik ınfraqurylymyn damytýǵa erekshe kóńil bólip otyrmyz. Qazir Shymkentte 24 magıstraldy kóshede orta jóndeý jumystary júrip jatyr. Badam ózeniniń ústinen ótetin myna kópir de mańyzdy nysandardyń biri. Tıisti basqarma men basqa da jaýapty organdar jumystyń sapaly júrgizilýin jáne belgilengen merzimde aıaqtalýyn qadaǵalaýy tıis, — dedi Murat Dúısenbekuly.
Munan keıin qala ákimi Iý.Gagarın, A.Asqarov kósheleriniń orta jóndeý jumystarymen tanysty.
Iý.Gagarın kóshesiniń Abaı dańǵylynan Ermat ata kóshesine deıingi 4.7 shaqyrymdyq bóligin orta jóndeýden ótkizýge bıýdjetten 335 mıllıon teńge bólingen. Al, A.Asqarov kóshesiniń Respýblıka dańǵylynan Abaı dańǵylyna deıingi bóligine 303 mıllıonnan astam qarjy qaralǵan.
Shymkent qalasy ákiminiń baspasóz qyzmeti
