Adamdardyń kóbi alǵashqy jeke kýáligin, júrgizýshi kýáligin nemese sábıleriniń alǵashqy qujattaryn alǵan kezderin eshqashan umytpaıdy. Al olardyń qýanyshty sátteriniń kýási – Halyqqa qyzmet kórsetý ortalyqtary. Onda kún saıyn Qazaqstan Respýblıkasynyń azamaty óz tólqujatyn alyp, alǵashqy júrgizýshi kýáligin rásimdep, jańa týǵan sábıiniń kýáligine ótinish berip jatady. Osyndaı sáttegi qýanyshty bólisip, jan jylýyn syılaý úshin "Azamattarǵa arnalǵan úkimet" jumystaryna jańa úrdis engizgenge uqsaıdy. Ómirindegi mańyzdy jaıttarmen baılanysty qujattaryn rásimdeýge kelgen ár turǵyn bul jerden kóterińki kóńil kúımen shyǵyp, syı-sııapattarǵa ıe bolyp jatyr.
Almaty qalasyndaǵy Áýezov aýdandyq HQO bólimine kelgen belgili ánshi Ashat Tarǵyn qyzmet kórsetýshilerge yrzalyǵyn bildirdi.
«Búgin ulymyz ekeýmiz Almaty qalasy Áýezov aýdanyndaǵy halyqqa qyzmet kórsetý ortalyǵyna bardyq. Jaqynda dúnıege kelgen qyzym Hadııanyń týý týraly kýáligi daıyn bolǵan eken. Sony ortalyq qyzmetkeri tabystady. Bizge kýálikpen qatar qoshametpen qurmet kórsetildi. Syılyq berdi.
Tańerteń erte barsańyz sizde alasyz.Ulyma chýpa-chýps berdi, shokolad berdi jumystaryńyzǵa sáttilik tileımin. Men únemi osy ortalyqqa baramyn.
#áýezovaýdandaǵyhalyqqaqyzmetkórsetýortalyǵy» - dep jazdy ınsta paraqshasynda.
Alataý aýdandyq HQO bólimine egiz balalaryna járdemaqy rásimdeýge kelgen Araılym, buryn mundaı quttyqtaýlardyń bolmaǵanyn aıtady. "Balalarymyzdyń bir jasqa deıingi kútimine arnalǵan járdemaqyǵa ótinish berdik. Endi ǵana "Kúmis alqaǵa" úmitti ana bolsam da, buryn bulaı iltıpat kórsetilmeıtin".
Almaly-2 front-ofısine kelgen Nıgerııa azamattary «Salyq tóleýshilerdi tirkeý» memlekettik qyzmetin aldy. Memlekettik tildi túsinbese de, bólim mamandarynyń joǵarǵy sapadaǵy qyzmeti men qurmetteri úshin alǵys bildirdi.
Al, Áýezov bólimine zeınet jasyn rásimdeýge kelgen Erkinbek Jamaldınuly Qoıshybaev, Qazaqstanda memlekettik qyzmetterdi usyný áldeqaıda joǵary deńgeıde ekenin aıtady. «Men Máskeýde jumys isteımin. Zeınetkerlikke qujattar rásimdeý maqsatynda kelgen edim. Reseımen salystyrǵanda qyzmet kórsetý jaqsy jolǵa qoıylǵan eken. Bólim qyzmetkerlerine rahmet" deıdi otandasymyz.
«Azamattarǵa arnalǵan úkimettiń» Almatydaǵy Almaly front-ofısinen qyzmet aldym. Aldyn- ala kezekti brondap kelý, pandemııa kezinde saqtyq sharalaryn saqtaý, sapaly qyzmet kórsetý – bári-bári jaqsy jolǵa qoıylypty. Mamandar sypaıy ári saýatty qyzmet kórsetýde...Sonymen qatar, qýanysh syılaýdy da umytpaıdy eken. Rahmet Sizderge! Eńbekterińiz jemisti bolsyn!» - deıdi Olımpıada chempıony Maıa Maneza.
Almaty qalasynyń Medeý aýdanynyń turǵyny Zeınab pen Arslan Gazıevter qyzy Leılanyń shetelge shyǵýǵa ruqsat beretin pasportyn alyp ketýge kelip, quttyqtaýlarǵa ıe bolǵanyna rıza.
"Leıla HQO-ǵa birinshi ret kelip edi.Osyndaǵy aǵa-apalarynan qurmet kórip, syılyq alyp, qýanyshy qoınyna syımaı tur. Qyzymyzdyń rııasyz qýanyshyna bizdiń de janymyz jadyrady", – deıdi anasy.
Azamattarǵa arnalǵan úkimettegiler "Baqytty klıent" tujyrymdamasyn qolǵa alyp, ár kelýshige sapaly qyzmet qana kórsetip qoımaı, osylaısha qyzmet alýshynyń kóńilin de aýlaýǵa tyrysatynyn aıtady.
«Halyqqa qyzmet kórsetý ortalyqtary - adamdardyń ómiriniń keıbir keremet sátteriniń kýási bolyp jatady. Dál osy sátter jaǵymdy estelik bolyp qalý úshin biz zeınetaqy rásimdeýge, balasynyń týý kýáligin alýǵa, 16-ǵa tolyp alǵashqy eresek qujatyn alýǵa kelgenderdi erekshe quttyqtap, mamandarymyz ornynan turyp, qol shapalaqtaıdy. Olardyń qýanyshyna qýanysh qosyp, syılyqtar jasaıdy. Qyzmet alýshynyń rızashylyǵy biz úshin qashanda qymbat. Osyndaı kórinister qyzmetkerlerge de qýat syılap, HQO ishinde erekshe kóńil kúı ornaıdy», – deıdi «Azamattarǵa arnalǵan úkimet» memlekettik korporaııasy Almaty qalasy fılıalynyń dırektory Danııar Qyryqbaev.
Engizilgen dástúr jetistikke jete me, joq pa, aıtýǵa erte. Degenmen, HQO-lar birinshi bolyp Qazaqstannyń memlekettik organdaryna trendterdi úlgi etip bastaǵanyn eske sala ketken jón. Olar birinshi bolyp kedergisiz qyzmet kórsetýdi, bir tereze jáne bir málimdeme qaǵıdatyn, "proaktıvti" qyzmetter uǵymyn engizdi jáne alǵashqylardyń biri bolyp azamattyń bıometrııalyq derekterin qoldana bastady.
Gúlvıra Asqarqyzy
"Adyrna" ulttyq portaly
