Qyrǧyzstan prezidentı Sadyr Japarov azamattar men zaŋdy tūlǧalarǧa üş jyl boiy jeŋıl jäne jük avtomobilderın, sondai-aq motosiklderdı satu kezınde salyq töleuden bosatudy qarastyratyn jarlyqqa qol qoidy. Būl turaly memleket basşysynyŋ baspasöz qyzmetı jariialaǧan, dep habarlaidy “Adyrna”.
Atalǧan norma «Ekonomikanyŋ jekelegen salalaryn qoldau şaralary turaly» qūjatta belgılengen. Ükımetke osy qūjatqa säikes zaŋ jobasyn bır ai ışınde Jogorku Keneştıŋ (parlamenttıŋ) qarauyna engızu tapsyryldy.
Prezident jarlyǧyna säikes, 2026 jyldyŋ 1 qaŋtaryna deiın alynǧan kırıster boiynşa avtokölık jäne mototehnika satu kezınde salyqtardan, ösımpūldardan jäne aiyppūldardan bosatu qarastyrylǧan. Būl jeŋıldık jeke käsıpker retınde tırkelmegen jeke tūlǧalarǧa ǧana qatysty bolady.
Sondai-aq Qyrǧyzstan aumaǧynda öndırılgen nemese jinalǧan avtokölıkter men qosalqy bölşekterdı satu kezınde fiskaldyq tölemderdı joiu josparlanyp otyr.
Qazırgı taŋda avtokölık satu kezınde mämıle nätijesınde alynǧan tabystyŋ 10%-y mölşerınde salyq alynady. Iаǧni avtomobildı satyp alu şyǧyndary men ony satu arqyly tüsken kırıs arasyndaǧy aiyrmaşylyqqa salyq salynady.
Būdan bölek, qūjatta tıgın salasy subektılerı üşın jeke tabys salyǧy mölşerlemelerın jäne saqtandyru jarnalarynyŋ tarifterın tömendetu qarastyrylǧan. Saqtandyru boiynşa jeŋıldıkter şaǧyn jäne orta biznes subektılerınıŋ barlyǧyna qoldanylatyn bolady.
Sondai-aq respublika aumaǧynan tys jerde jüzege asyrylatyn qyzmet üşın (bırıŋǧai tölem) jäne şeteldık bankter arqyly jürgızıletın tranzaksiialar üşın 0,1% mölşerındegı salyq mölşerlemelerı engızıledı.
Eleulı qoldau zergerlık sala käsıpkerlerıne baǧyttalǧan. Atap aitqanda, bilık olar üşın jabdyq, tehnologiia, şikızat, qosymşa materialdardy importtauǧa, sondai-aq daiyn önımdı körmeler men järmeŋkelerge şyǧaru kezınde kedendık bajdar men salyqtar boiynşa türlı preferensiialar engızudı josparlap otyr.
Basqa jeŋıldıkterdıŋ qatarynda:
- būǧan deiın äkelıngen nemese öndırılgen baǧaly metaldardan jasalǧan zergerlık būiymdardyŋ qaldyqtaryn ekı ai ışınde zaŋdastyru mümkındıgı jäne salyq organdary tarapynan tekserısterge moratorii engızu;
- qyrǧyzstandyq öndıruşılerge būiymdardy tiıstı synamalyq taŋbamen rastaityn öz taŋbasyn qoiu jäne synau funksiialaryn beru;
- memlekettık baǧaly metaldar jäne asyl tastar qorynyŋ şikızatyna London baǧaly metaldar naryǧy qauymdastyǧynyŋ belgılengen baǧasynan 2% jeŋıldıkpen qoljetımdılıktı jeŋıldetu;
- zergerlık kompaniialarǧa baǧaly metaldardy şikızat küiınde tıkelei kelısımşarttar nemese tauar-şikızat birjasy arqyly 180 künge deiın tölemdı keiınge qaldyru şartymen satyp aluǧa mümkındık beru;
- «Aiyl bank» jäne «Eldik bank» arqyly qarjy retteuşısımen kelısım boiynşa jeŋıldetılgen nesieler alu mümkındıgı.
