Oblys ákimi Gúlshara Ábdiqalyqovaǵa «hannyń qyzysyń ba?» degen jańaqorǵandyq belsendi Sandýǵash Turlybekovanyń vıdeosyn el áli umyta qoıǵan joq. Áleýmettik jelini shýlatqan jańaqorǵandyq belsendiniń bul vıdeosy aýdan ákimi Sultan Maqashovqa abyroı bermegenge uqsaıdy. Aqyry aýdan ákimi Sultan Maqashov qyzmetinen ketip tyndy.
Jańaqorǵan aýdanyna jańa ákim keldi. Ony aımaq basshysy Gúlshara Ábdiqalyqova jurtshylyqqa tanystyryp, qyzmetine sáttilik tiledi.
Sóıtip, oblys ákiminiń ókimimen jáne Qazaqstan Respýblıkasy Prezıdenti Ákimshiligi men Jańaqorǵan aýdandyq máslıhatynyń kelisimi boıynsha Jańaqorǵan aýdanynyń ákimi laýazymyna Rústemov Rýslan Rústemuly (sýrette) taǵaıyndaldy.
Eskerte keteıik, Rýslan Rústemovtiń esimi oblys, aýdan jurtshylyǵyna jete tanys. Birneshe jyl buryn Jańaqorǵan aýdanyn basqarǵan.
Ol ál-Farabı atyndaǵy Qazaq memlekettik ulttyq ýnıversıtetiniń fılologııa fakýltetin bitirgen bitirgen.
Eńbek jolyn Qyzylorda pedagogıkalyq ınstıtýtynyń Qazaq ádebıeti kafedrasynyń oqytýshysy retinde bastaǵan. 1997-2002 jyldary – Qyzylorda qalasy ákiminiń apparatynda maman, konsýltant, Qyzylorda qalasy ákiminiń baspasóz hatshysy, Qyzylorda qalalyq mádenıet bóliminiń meńgerýshisi, Qyzylorda qalasy ákimi apparatynyń ishki saıasat jáne áleýmettik sala bóliminiń meńgerýshisi. 2002-2010 jyldary – Qyzylorda oblysynyń mádenıet basqarmasy bastyǵynyń orynbasary, Qyzylorda oblysy ákimi apparatynyń áleýmettik - saıası bóliminiń meńgerýshisi, Shıeli aýdany ákimi apparatynyń basshysy, Shıeli aýdany ákiminiń orynbasary. 2010 - 2019 jyldary Qyzylorda oblysynyń tilderdi damytý basqarmasynyń basshysy, eki márte Qyzylorda oblystyq ishki saıasat basqarmasyn basqarǵan, Qyzylorda qalasy ákiminiń orynbasary, Jańaqorǵan aýdanynyń ákimi, Qyzylorda oblysy ákiminiń orynbasary bolǵan.
2019 jyldyń tamyz aıynan bastap osy kezge deıin Syrdarııa aýdanynyń ákimi laýazymynda qyzmet atqaryp keldi.
Erkin Qaldan,
«Adyrna» ulttyq portaly
