Irannyń eks-prezıdenti Mahmýd Ahmadınejad halyqtyń esinde erekshe kóshbasshy retinde qaldy. Saıasatker 2005-2013 jyldar aralyǵynda el bıledi. Ol halyqqa jaqyn bolýǵa, turǵyndardyń qajettilikteri men talaptaryn túsinýge tyrysty.
Jumysqa avtobýspen baratyn prezıdent
Mahmýd Ahmadınejad - óte qarapaıym adam. Basshy jumysqa avtobýspen baryp, kez kelgen adam sııaqty jol aqysyn tóleıtin edi. Ol el basqarǵan shaqta jubaıy kóptegen qarapaıym áıelder sekildi bilim berý mekemeleriniń birinde eden jýýshy bolyp jumys istegen.
«Halyqtyń qulymyn»
Birde amerıkandyq jýrnalıst prezıdentten «Aınadaǵy beıneńizden kimdi kóresiz?»-dep suraǵan. Sonda Mahmýd «Aınadaǵy beıneme únemi «Halyqtyń quly ekenińizdi umytpańyz» dep aıtamyn»,- dep jaýap beripti.
Rasymen de, Ahmadınejad bul ustanymdy berik ustandy. Basshy qyzmetke kirisken alǵashqy kúnnen bastap el turǵyndaryn tańǵaldyrýmen boldy. Ol eń aldymen jumys bólmesindegi barlyq qymbat parsy kilemderin meshitke berýdi buıyryp, ózi kádimgi arzan tósenishterdi tóseýge sheshim qabyldady.
«Jastarǵa jol berý kerek»
M.Ahmadınejad el bılegen shaqta professorlardy erte zeınetke shyǵardy. Bıliktiń túsindirmesi boıynsha, bul jastarǵa jol berý úshin jasalǵan.
Qoı baǵyp júrgen eks-prezıdent
Mahmýd Ahmadınejadtyń 1977 jylǵy eski Peugeot kóligi men ákesinen qalǵan shaǵyn úıi ǵana bar. Basshy basqa sheneýnikterdi de baqylaýda ustaýdy jón kórdi. Eks-prezıdenttiń basshylyǵymen mınıstr qyzmetine kiriskenderdiń barlyǵy «baıymaımyn» degen qaǵazǵa qol qoıdy. Sondaı-aq, olardyń týystarynyń esepshottary da muqııat tekserilip otyrdy. 2013 jyly otstavkaǵa ketkennen keıin, Mahmýd aqsha úshin emes, halyqtyń ıgiligi úshin jumys istedim dep prezıdenttiń arnaıy zeınetaqysynan bas tartty. Qazirgi tańda ol ýnıversıtette dáris oqyp, jalaqysyna ómir súrýde. Bos ýaqytynda qoı baǵady.
Dıana ASAN,
«Adyrna» ulttyq portaly
