Elimizdegi karantındik jaǵdaıǵa baılanysty barlyq bilim oshaqtary qashyqtan oqytý júıesine kóshkeni málim. Osy rette respýblıkalyq «Ustaz tilegi» ǵylymı-ádistemelik ortalyǵy 50 myńnan asa ustazǵa kómek qolyn sozyp, onlaın júıesimen tegin oqytty. Istiń basy-qasynda júrgen ortalyqtyń dırektory Nartaı Sembıevpen atqarylǵan jumystar týraly az-kem suhbattasqan edik.
-Qashyqtan oqytýǵa baılanysty, ustazdardy tegin oqytý týraly ıdeıa qalaı keldi?
-Elimizde jarııalanǵan tótenshe jaǵdaılarǵa baılanysty barlyq bilim berý uıymdary qashyqtan oqytý júıesine kóshti. Biraq elimizdegi ustazdar qashyqtan oqytý júıesin áli tolyq meńgermegen. “Ustaz tilegi” saıtynda muǵalimder qashyqtyqtan oqytýǵa baılanysty jańa bilimdi ıgergisi keletini týraly jaza bastady. Biz naryqty zerttep, ustazdarǵa paıdaly tehnologııalardy saralap, kýrs jasadyq. Kýrsty aıaqtaǵan ustazdar sertıfıkatqa ıe bolyp, qashyqtyqtan oqytýdyń barlyq joldaryn meńgerip shyqty. Kýrs ereksheligi - teorııalyq bilim ǵana berilip qoımaı, jańa tehnologııalardy praktıka júzinde qoldanýdy úıretedi.Tehnologııalardy meńgerý ustazdarǵa tıimdi bolý úshin, kýrsty tegin jasadyq. Bul elimizge degen, ustazdarǵa degen ortalyqtyń atynan jasalǵan úlken kómek.
-Ortalyqtyń jumysy týraly aıta ketseńiz. Qalaı quryldy?
-Jalpy basynda men programmalaý boıynsha ártúrli saıttardy jasap júrdim.Sol kezde naryqty zertteı kele, ustazdarǵa, oqýshylarǵa kómek kórsetetin saıttardyń joq ekenin bildik. Óte az nemese sapasyz. Sondyqtan elimizdegi ustazdarǵa kómektesý úshin jas ta bolsaq, ustazdardyń bilim alýy úshin osyndaı ortalyq ashý oıymyzǵa keldi. Qazir “Ustaz tilegi” saıtyn úlken portal qylyp, respýblıkalyq platforma retinde ashyp jatyrmyz. Eger biz bir ustazǵa sapaly bilim bersek, júzdegen oqýshyǵa sapaly bilim bergenmen teń dep oılaımyn. Bir ustaz myńdaǵan oqýshyny oqytyp shyǵara alady. Ustazdarǵa barynsha jaqsy bilim berip, biliktiligin kótersek, elimizdiń órkendeýine zor úles qosyp jatyrmyz dep esepteımin.
-Alda qandaı josparlar bar?
-Aldaǵy maqsatymyz – “Ustaz tilegi” brendin qalyptastyryp, ustazdarǵa úlken platforma ashý. Platformada barlyq pánderden kýrstar bolady. Muǵalimder ózderiniń biliktiligin arttyrý kýrstaryna qatysa alady. Qazir muǵalim mamandyǵyn tańdaǵan stýdentter mektepte baryp birden jumys istep kete almaıdy. Onyń basty sebebi: ýnıversıtetterde eski tehnologııalardy qoldanady. Solardyń barlyǵyna sapaly bilim berip, zamanaýı bilim alý úshin kýrstar ashamyz. Jáne árbir muǵalim “Ustaz tilegi” saıtyna tirkelip barlyq qyzmetterdi qoldana alady. Onyń ishinde óziniń porfolıosyn toltyrý, kýrstarǵa qatysý, jarystarǵa qatysý, respýblıkalyq, halyqaralyq deńgeıdegi ártúrli jarystarǵa qatysý, jáne sheteldegi kompanııalarmen birigip, bizdiń ustazdar shetelde bilim alyp, tájirıbe bólisetin úlken ortalyq retinde damytýdy kózdep otyrmyz.
“Ustaz tilegi” brendin álemdik deńgeıge kóterip, bilim berýde jańalyqtar engizip, ózge elderdegideı jaǵdaı jasaý. Mysaly, Japonııa elinde qadirli mamandyq ustaz bolsa, bizdiń elimizde de ustazdardy sondaı deńgeıge jetkizgimiz keledi.
Áńgimelesken Ásem Merekeqyzy,
«Adyrna» ulttyq portaly
