Jany alqymǵa tyǵylyp,
Jete almaı aýrýhanaǵa,
Qynadaı halyq qyrylyp,
Qyryldap qaldy dalada!
Keshirshi bizdi, kári ana,
Keshirshi bizdi, jan-aǵa!
Zar bolyp, óldiń dalada,
Bir jutym taza aýaǵa!
Ózime qarsy denem bul,
Shyǵarma deıdi daýsyńdy.
Koronavırýs degen bir
Kórinbes kózge jaý syndy.
Bir jutym aýa... ańsaǵan,
Shyryldap shybyn jan tátti-aı.
Mert boldy búgin qansha adam,
Soǵysta ketken soldattaı?!
Máıitke toldy kór ishi,
Marqum bop qazaq-orysy.
Adam men vırýs soǵysy –
Koronovırýs soǵysy!
Qorshaýdy buzyp-jaryp shyq,
Soǵysta jeńip, tez oral!
Halqymdy aman alyp shyq,
Dáriger deıtin general!
Bitedi qashan bul jut-aı,
Kele me sońǵy sát taıap?!
Álemdi qyrdy-aý qý Qytaı,
Halyqqa bir oq atpaı-aq!
Zıratta zarlap záýzattar,
Janyna kele almadyq.
Armanda ketken arýaqtar,
Arýlap kóme almadyq.
Bozdady halyq, boldyrdy,
Shyǵady qaıdan taǵy shý?!
Kóz jasy ma eken kóp jylǵy,
Keýdeni qysqan sary sý?!
Bul bılik – sıyr súti joq,
Malshysy... qoı, qoı, aıtpa, oıbaı!
Dárisin satty-aý Úkimet,
Soǵysta oǵyn satqandaı!
Tútinin ýly jutyp ek,
Zaýyttar peshin jaqqanda.
Otshashý atty-aý Úkimet,
Ottegi jetpeı jatqanda?!
Aýysar qashan bul bılik,
Emes qoı elim tilsiz qul?!
«Únsizdik – deıdi-aı – 1 mınýt?»,
30 jyl halqym únsiz júr!
Jylaıyn desem, jas emes,
Qan toly kózdiń ishinde, eı!
Júregim meniń... tas emes
Elbasy eskertkishindeı!
Bárine «duǵaı sálem» de,
Aýyrma, aman bol, balam!
Bolaıyn men-aq, álemde
Bul dertten ólgen sońǵy Adam!
Aýyrǵan jandar túsiner,
Atańa nálet, bárińdi!
...Iship ól óziń, iship ól,
Qoımańa tyqqan dárińdi...
Almas Temirbaı
12.07.20
