Pavlodar oblysy, Qalqaman aýylynyń turǵyndary jalǵyz jaıylymnyń kásipkerlerge berilip, mal jaıatyn jer qalmaǵanyn aıtyp, ákimdikke sıyr tabynyn aıdap ákelgen. Ashýly turǵyndar narazylyq akııasyn osylaı uıymdastyrýdan basqa amaldary qalmaǵanyn aıtady. Bul týraly KTK arnasy habarlady.
Aýyl turǵyndarynyń aıtýynsha, jyldar boıy mal jaıyp júrgen jalǵyz jaıylymdy aýmaqqa qazir aıaq basý múmkin bolmaı tur. Sebebi, ol jerge jergilikti kásipkerlerdiń biri baý-baqsha egip tastaǵan. Maldy qolǵa ustaý qymbatqa túsedi.
"Al, sıyrlar, jaıylyńyzdar! Senderge jer joq, senderdiń attap shyǵatyn jerlerińniń bárin alyp qoıǵan! Endi erteńnen bastap osynda jaıylyp qaıtasyńdar!" - deıdi ashynǵan aqsaqal.
Sıyrlar jergilikti jerdegi qoqys alańynda jaıylyp, sol jerde qaldyqtarmen ýlanyp, sútin joǵaltady eken. Buryn aýylda 200-den astam sıyr bolǵan, qazir mal basy úsh esege azaıyp ketken.
"500 myń teńge alyp eki sıyr alǵan adamdar bar. Endi sol maldy ósiretin múmkinshilik keltirmeı otyr. Qalqamanǵa bir ákim keledi. Sózben "jóndeımiz-jóndeımiz" dep shyǵaryp salady. Mal baǵatyn jer joq", - deıdi aýyl turǵyndarynyń biri.
Birneshe kún buryn bir aýyl turǵynyna onyń sıyry mektep aýlasyndaǵy gúldi jegeni úshin mal ıesine 50 myń teńge aıyppul salynǵan.
Al ákimdiktegiler jaǵdaı janjal shyǵaratyndaı emes, tek 50 gektar jer jalǵa berilgenin, qalǵan jerdiń bári bos jatqanyn, ári zańdy berilgenin aıtýda.
"Jaıylym boıynsha másele joq, jalǵyz másele – sýarý. Sýarý kezinde barlyq mal osy atyz arqyly júredi. Endi biz aldaǵy bir apta ishinde kásipkerlerge óz aýmaǵyn qorshaýdy usynamyz", – dedi Qalqaman aýylynyń ákimi Nurbulan Musabekov.
Jergilikti turǵyndar eski jaıylymdy qaıtarýdy talap etti. Olaı bolmaǵan jaǵdaıda sıyrlardy kún saıyn ákimshilikke qaraı aıdaıtyndaryn aıtyp otyr.
"Adyrna" ulttyq portaly
