AQSh-tyń Mıssýrı shtatynyń bas prokýrory Qytaıdy sotqa berdi. Erık Shmıtt Beıjińdi koronavırýs indeti týraly aqparatty jasyrdy, shtat turǵyndaryna zııan keltirdi dep aıyptaıdy. Bul týraly Center Asian habarlady.
Shaǵymda koronavırýstyń keń taralyp ketýine Qytaı jaýapty ekeni, indettiń aldyn alýǵa bolatyny aıtylǵan. Shmıtt Qytaı bıligi elin tez jabýy kerek edi dep esepteıdi. Ol sonymen birge vırýstyń adamnan adamǵa tez juǵatyny týraly aqparatty jasyryp keldi dep aıyptaıdy.
Qurama Shtattarda budan bólek Qytaıǵa qarsy birneshe aryz berilgen. ABC telekanalynyń habarlaýynsha, Nıý-Iorktyń úsh turǵyny Dúnıejúzilik densaýlyq saqtaý uıymyn (DDSU) sotqa berdi. Olar atalǵan uıym Beıjińmen pandemııaǵa baılanysty qupııa sóz baılasqan dep esepteıdi.
Osyǵan deıin AQSh prezıdenti Donald Tramp ta DDSU-ny aıyptap, qarjylandyrýdy ýaqytsha toqtatty. Tramptyń pikirinshe, DDSU Qytaıǵa senip, indettiń aldyn alýyn toqtata almaı qaldy. Tramp Qytaıdyń COVID-19 vırýsyn juqtyrǵandardyń kórsetkishi týraly málimetine senbeıtinin birneshe ret aıtqan.
Álemde COVID-19 vırýsyn juqtyrǵandar boıynsha AQSh birinshi orynda tur – 820 myń adamnan vırýs anyqtaldy, 45 myńnan astam adam kóz jumdy.
"Adyrna" ulttyq portaly
