ShYMKENT: JOL SAPASY BASTY NAZARDA!

17.04.2020

2411

Qala aýmaǵyndaǵy jol máselesi aldaǵy birneshe jylda kezeń-kezeńimen sheshimin tabady. Shymkenttiń quramyna engen 41 eldi mekenniń de ınfraqurylymy qaıta qaralady. Mıllıondy qaladaǵy joldy jóndeý jumystaryna bıyl qazynadan 25 mlrd. teńgeden astam qarjy bólingen. Bul qomaqty qarajat. Ony ýaqytynda ári maqsatty ıgerýimiz qajet, dedi shahardaǵy jol qurylysymen tanysqan qala ákimi Murat Áıtenov.
Merdigerler kompanııalar men tehnıkalyq qadaǵalaýshy uıymdardyń ókilderimen júzdesken qala basshysy joldyń sapasyn qurylys bitken soń emes kemshilikterdi aldyn-ala anyqtap, joıý kerektigin eskertti.
– Buǵan deıin jol salynyp bolǵan soń baryp sapasy tekseriletin. Qazir qurylys júrip jatqan kezde baqylaýǵa múmkindik bar. Ol úshin arnaıy jyljymaly zerthanalar jumys isteýde. Zamanaýı qurylǵy olqylyqty der kezinde anyqtap beredi, deıdi «Jol aktıvter sapasy ortalyǵy» fılıalynyń dırektory Muhtar Dúısenbekov.
Qala ákimi atalǵan ortalyqqa jol qurylysynyń sapasyn qataý baqylaýǵa alýdy tapsyrdy.
Shymkente jalpy avtomobıl joldarynyń jalpy uzyndyǵy 2 976,6 shaqyrymdy quraıdy. Onyń 1 758 shaqyrymyna asfalt tóselgen.
Qalada bıyl 417,6 shaqyrym jolda qurylys jáne jóndeý jumystary júrgizilýde. Oǵan bıýdjet esebinen 25,6 mlrd.teńge baǵyttalǵan. Onyń 5,1 mlrd. qarjysy respýblıkalyq, qalǵan 20,5 mlrd. teńgesi jergilikti bıýdjetten qaralǵan. Bul qarjyǵa 294 shaqyrym jol men 6 kópir jáne 1 jolaıryq salynýda.
Búginde qalalyq mańyzy bar magıstraldy kóshelerdiń 75,3 shaqyrymynda qurylys jumystary júrgizilýde. Onyń ishinde D.Qonaev dańǵyly jalǵasynyń qurylysy men aınalma jolynyń qaıta qurý jumystary qamtylǵan. Iri jobalar qaladan shyǵatyn barlyq baǵyttardy qamtyp otyr. Atap aıtqanda Tashkent, Túrkistan jáne Almaty baǵyttaryna shyǵatyn joldar jóndelýde. Oǵan qosa qala joldarynda kólik keptelisterin boldyrmaý maqsatynda, 4 jolaıryqtyń qurylysyn júrgizý josparlanýda.
«Nurtas» shaǵynaýdanynda bıyl 18,8 shaqyrymdy quraıtyn 11 kósheniń kúrdeli jáne ortasha jóndeý jumystaryna 1,1 mlrd., al, «Bozaryqtaǵy» 6 kóshege 230,8 mln. teńge qarjy qaraldy.
Oblystyq mańyzy bar QH-82 avtomobıl jolynyń 18,1 shaqyrymyna kúrdeli, 8 shaqyrymy qaıta qurylymdaýdan ótip jatyr. Saıram sý ózeniniń ústine salynyp jatqan kópir qyrkúıekte paıdalanýǵa berilmek.
«Saıram» shaǵynaýdanynda 6 kósheni ortasha jóndeýge 164,8 mln. qaralsa, «Bazarqaqpadaǵy» 3 kósheni ortasha jóndelip jatyr.
Qala ákimi Murat Áıtenov osy atalǵan jol qurylysynyń jumysymen jeke-jeke tanysyp shyqty. Turǵyndarmen júzdesip kópshiliktiń kókeıinde júrgen saýaldarǵa jaýap berdi.
Shetki turǵyn alaptardyń aqsaqaldary qoǵamdyq kólik, jol, jaryq máseleleri boıynsha atqarylyp jatqan jumystar úshin qala ákimine rızalyǵyn bildirip, aq batasyn berdi.