Eńbek jáne halyqty áleýmettik qorǵaý mınıstri Birjan Nurymbetov 42 500 teńgeni alý kezinde týyndap jatqan máselelerge toqtalyp, bankterge úndeý jasady. Sondaı-aq, dekrettik demalysta otyrǵan analarǵa bala kútimine baılanysty bir jylǵa deıin memleket tarapynan járdemaqy tólenetinin de eskertip, tabysynan aırylǵan azamattardyń barlyǵy da 42 500 teńge alady dedi.
Mınıstrdiń aıtýynsha, tótenshe jaǵdaı kezinde kirisinen aıyrylýyna baılanysty áleýmettik tólem alýǵa 938 myń adamnan ótinish túsken.
"Ótinishti bergen kezde, aqshany aýdarý úshin esepshot kórsetý qajet. Biraz azamatta mundaı esepshot joq bolyp shyqty, ómirinde eshqashan ashpaǵan. Sondyqtan, olar ótinish toltyrǵanda, úlgermeı qalatyn boldyq dep shot ashý úshin bankterge júgirip jatyr. Sondyqtan biz oılastyryp, bir-eki kúnde mynadaı ózgeris engizemiz: Siz ótinishti bergen kezde, bankte shotyńyz bolmasa, shotty kórsetetin jerge eshteńe jazbaısyz. Biz ótinishti qabyldaımyz, áleýmettik tólem taǵaıyndaımyz. Sóıtip, siz esepshotty usynǵanǵa deıin kútemiz. Bir aıǵa deıin kútemiz. Shotty alǵan soń, aqshany aýdaramyz", - dep túsindirdi mınıstr.
"Men búkil bankke úndeý jasaǵym kelip otyr. Qazirgi qıyn kezeńde biz sekildi "bir terezeden" halyqtyń ótinishin qashyqtan qabyldap, málimetterin alyp, esepshotyn syrttaı engizip, kartalaryn ázirlep, úıine jetkizip berýge shaqyramyn", - dedi mınıstr.
"Dekrettegi analar bir jyldan soń, olar jumysqa shyǵar edi. Biraq, qazir olardy eshkim jumysqa almaıdy. Sondyqtan dekrette otyrǵan analar bir jyldan soń, biryńǵaı jıyntyq tólemdi tólep, 42 500 teńge járdemaqyny alýǵa múmkindigi bar", - dedi Birjan Nurymbetov.
"Adyrna" ulttyq portaly
