Túrkimenstannyń medıına salasyndaǵy derekkóz elde keminde eki adamnyń koronavırýs juqtyrǵany anyqtalyp, qazir Ashǵabad shetindegi aýrýhanada emdelip jatqanyn aıtty, dep jazady centralasian.org.
Derekkózdiń aıtýynsha, olarǵa COVID-19 dıagnozy on kún buryn qoıǵan. Ázirge naýqastardyń shetelden ne elde juqtyrǵany belgisiz.
Biraq juqpaly aýrýlardyń aldyn alý jáne emdeý ortalyǵynyń qyzmetkeri elde koronavırýs juqtyrǵandardyń anyqtalǵany týraly málimetti teriske shyǵardy.
«Bul aqparat shyndyqqa sáıkes kelmeıdi. Eshqandaı koronavırýs joq. Bizde tek karantınde alynǵan adamdar bar»,- dedi ol.
Túrkimenstan bıligi bıyl 25 aqpanda ǵana koronavırýs týraly birinshi ret aıtyp, elde bul vırýsty juqtyrǵandar joq dedi. Oǵan deıin memlekettik BAQ bul taqyryp jóninde tis jarmaı, koronavırýstyń álemde jaıylyp jatqany týraly málimet bermeı kelgen.
