Búgin, 27 aqpan kúni Aqmola oblysy Talapker aýylynda eki kún buryn Nur-Sultandaǵy tergeý ızolıatorynda qaıtys bolǵan belsendi Dýlat Aǵadildi sońǵy saparǵa shyǵaryp saldy. Qarly boranǵa qaramaı janazaǵa myńnan astam adam jınaldy. Olardyń arasynda ár óńirden kelgen qoǵam belsendileri, saıasatkerler jáne jýrnalıster boldy.
Qaraly janazaǵa jınalǵan jurt Dýlat Aǵadildiń ádilet úshin kúresken batyl azamat, kóp balaly analarǵa arasha túsken kúresker bolǵanyn aıtyp, onyń ólimine bılikti kinálady.
Dýlat Aǵadildi Talapker aýylynyń mańyndaǵy zıratqa qoıdy.
Aqmola oblysynda belsendini jerlep jatqan kezde Qazaqstannyń Almaty, Taraz, Aqtóbe qalalarynda da qaraly jıyn ótip, belsendini eske aldy. Almatyda Respýblıka alańyna jınalǵan 70-80 shaqty adam Dýlat Aǵadildiń rýhyna quran baǵyshtap, sóz sóıledi. Kózine jas alǵan adamdar da kóp boldy.
Ularbek Dáleıuly
