Bul kúnde sharýasyn shalqytqan, dáýletin tasytqan eńbek adamdary qaı aýylda da kóbeıip keledi. Olardyń sharýasyn kórgende kóńiliń marqaıady. Osyndaıda «qazaq jalqaý» degen sózge shúbá keltiresiń. Árıne, qoǵam bolǵan soń «qasyq ustaýshylardyń da» kezdesip qalatyny shyndyq. Degenmen, biren-saran mundaılarǵa qarap, bárine kúıe jaǵýǵa bolmaıdy. Iá, aýylda eńbek etetinder kóbeıe tústi.
Solardyń biri – Kókterek aýyldyq okrýgine qarasty «Tólegen» sharýa qojalyǵynyń jetekshisi Anarbek Jaılaýbaev. Anarbek zaıyby Aqjarqyn ekeýi 1997 jyly atakásipti qolǵa alǵan.
Otyzǵa da tolmaǵan jas jubaılar aýyldy boılaı aǵyp, Isataı – Mahambet babalarymyzdyń naıza ustap, «Ereýil atqa er salmaı…» júrgen qasıetti jerge nár berip turǵan Saryózenniń boıynan sharýalaryn bastaǵanda isteri júrip ketti desek, qatelesken bolarmyz. Tabys mańdaı termen keledi ǵoı. Sol jolda erli-zaıyptylar kún-tún demeı eńbek etti. «Mal baqqanǵa bitedi» ǵoı. Atakásip tórt túlikti ósirýdiń árqaısysynyń ózindik ereksheligi bar. Máselen, Qambar ata tuqymyn qoraǵa qamap, kóbeıte almaısyń. Olarǵa erkindik kerek. Samal jelmen jarysyp, aıaǵy jetken jerlerge baratyn bul qasıetti janýarǵa kóz alartatyndar da kóp. Solardyń ishinde dala qasqyry da, adam «qasqyry» da bar…
Bala kezinen jylqyny jaqsy kóretin Anarbek zaıyby Aqjarqyn ekeýi attan túspeı, dala qosynda túnep júrgen kezderi de boldy. Qoldaryndaǵy basqa maldarǵa da osyndaı kózqaraspen qarady.
Nátıjesinde tabystary órledi. Olaı dep turǵanymyz, búgingi kúnde sharýa qojalyǵynda 90 iri qara, 1500 qoı-eshki, 86 jylqy bar. Tehnıkalary da jetkilikti. Máselen, lızıngke shóp shabatyn tehnıkalar alsa, sonymen qatar, 2 traktordy qolma-qol qarajatqa satyp alyp otyr. Úıdiń janynda «djıp» avtokóligi meni minip, serýenge shyqsaıshy degende, jarqyrap ol tur… Mine, tabys degen osy.
Biz áńgimelep otyrǵan Anarbektiń taǵy bir qyry bar. Ol – atqumarlyǵy. Bizge arǵymaǵyn jetektep alyp keldi.
– Myna aldaryńda turǵan aǵylshyn-arab tuqymdy sáıgúlik. Qazir báıgege qosylyp júrgen sáıgúlikter – aǵylshyn-arab tuqymdas jylqylar. Olar qysqa qashyqtyqty ońaı baǵyndyrady. Aldaǵy ýaqytta osy sáıgúlikti baptap, báıgege qospaqshymyn. 1,5 mln. qarajatqa túsken bul janýardy Reseıden aldyrdym. Al bir erekshiligi baý-baqsha ónimderimen azyqtandyrǵandy jaqsy kóredi. Sondyqtan bul sáıgúlikke arnaıy jertólede ( pogreb) kókónisin ázirlep qoıdym.
Alla qossa, aýdanda ótetin Uly Jeńistiń 70 jyldyq merekesine báıgege qospaqshymyn.
Endi kúni keshe ǵana Rostov qalasynan aǵylshyn tuqymdas eki sáıgúlikti alyp keldim. Olar qorada tur. Bul janýarlardy syrt kózge ázirshe kórsetkim kelmeıdi, – dep kúldi Anarbek bizben áńgimesinde.
Osy arada bizdi arnaıy issaparǵa aparǵan Qaztalov aýdany ákimi Nurlan Bekqaıyr áńgimege aralasyp, Anarbek, biz seniń sharýashylyǵyńnan báıgeniń aldyn bermeıtin, aýdannyń atyn qalyń elge tanytatyn sáıgúlikter shyqsyn, sonymen qatar jas urpaqty shabandozdyqqa tárbıeleıtin arnaıy orynǵa aınalsyn degen tilegim bar, dedi.
Iesiniń qolynan sábiz jep turǵan sáıgúlikke biz de aldaǵy dúbirli jarystarda Aqannyń Qulageri sııaqty dara kelýdi tiledik. «Saryózenniń» boıyn meken etken Anarbektiń kásibine shyn kóńilmen rıza bolyp attandyq.
Aıtpaqshy, óz eńbeginiń baqytyna bólingen Anarbektiń osyndaı tabysqa jetýine kómekshi bolyp júrgen jubaıy, «Kúmis alqa» ıegeri Aqjarqynnyń da bul jetistikterde qoltańbasy bar ekenin aıta ketýdi jón sanadyq.
Jańa áńgime barysynda Saryózen boıyna ata kásipti jalǵastyrýǵa kelgen Anarbek pen Aqjarqynnyń bul kúnde adal eńbektiń nesibesin kórgen jáne nemere súıgen eńbekteri elengen otbasy ekenderin aıtqan durys.
Gúlfııa KÓShBAEVA,
jýrnalıst,
Temir Qusaıyn,
«Egemen Qazaqstan».
Batys Qazaqstan oblysy,
Qaztalov aýdany.
