Baıaǵyda Súleımen degen patsha kirpi men qarǵaǵa bylaı dep buıryq beredi:
- Sen qarǵa, bir kúnde jer dúnıeni aralap, bir jaqsy saıraıtyn qus tap. Ol qusty meniń bas jaǵyma ákelip otyrǵyz. Tań atqanda ol qus meni saıraǵan daýsymen oıatsyn. Al, sen, kirpi, baryp jerdiń júzin tintip, bir jumsaq nárse tap. Ol nárseni ákelip dál meniń jastyǵymnyń ústine, betime taqaý qoı. Qustyń saıraǵanymen oıanǵan kezde, betim sol jumsaq nársege tısin!
Qarǵa damyl tappaı, kóp jerdi aralap, kóp qustyń saıraǵany unamaıdy. Munyń oılaýynsha bulbul jáne basqa qustar jaman saıraıtyn bolyp kórinedi. Daýysy jaqsy qus taba almaı, qarǵa sorly qaıǵyrady. «Endi maǵan ólim keldi ǵoı!» dep, tań mezgilinde sharshap shaldyqqan qarǵa uıasyna qaıtady. Anasyn kórgen soń balapandary qarqyldaı bastaıdy. Bulardyń qarqyldaǵany qarǵaǵa sondaı ádemi, sondaı názik kórinedi. Bulardyń qasynda bulbul jáne basqa qustar áldeqaıda jaman saıraıtyn bop kórinedi. Qarǵa qýanyp, balapandaryn Súleımenge ákelip, bas jaǵynan uıa salyp, soǵan otyrǵyzady.
Kirpi de damyl tappaı, jerdiń júzin kezip, jumsaq nárse izdeıdi, biraq esh jerden taba almaıdy. Bul da jalyǵyp, aryp ashyp úńgirine qaıtyp keledi. Anasyn kórgen soń, balalary aldynan shyǵyp, qushaqtaıdy. Kirpi de qushaqtaıdy. Kirpige balalarynyń denesi sondaı jumsaq bop seziledi. Sonda ol jer betinde meniń balalarymnan jumsaq esh nárse bolmas dep oılaıdy da, balalaryn Súleımenniń saraıyna alyp baryp, jastyǵynyń ústine jatqyzyp qoıady.
Tań atady. Qarǵanyń balapandary qarqyldaı bastaıdy. Súleımen oıanyp, olarǵa qaraı bergende, munyń betine kirpi balalarynyń túrpi tikenderi qadala ketedi. Qarasa, qarǵanyń balapandary men kirpiniń balalary eken.
Súleımen ashýlanyp, qarǵa men kirpini shaqyrtyp alyp, jendetterine bulardyń basyn kesýge buıyrady. Jazaly bolǵan qarǵa men kirpi:
- Dat,taqsyr!.., – deıdi.
Súleımen:
- Aıt datyńdy! – deıdi.
Jazaly ekeýi ózderi istegen istiń bárin bastan aıaq baıan etedi.
Sonan soń Súleımen:
- Árkimge óziniń balasynan artyq kóretini joq eken ǵoı. Balasy ózine baldan tátti, ottan ystyq, kúnnen jaryq, mamyqtan da jumsaq eken ǵoı, — dep qarǵa men kirpini jazadan bosatyp jiberipti.
