Bir tyshqan tamaq aýlap, inine qaıtyp kelse, onda bir jylan jatyr eken. Tyshqan munan jaman qorqyp, qýyp shyǵarýǵa batpaı, aqyl suraı, óziniń qaıǵysyn aıtqaly kórshilerine barady. Aqyldy tyshqandar jıylysyp otyryp, keńesin aıtypty:
Sen ol indi tastap, ózge in qazyp al. Jylan seniń inińdi tartyp alǵany ádildik emes, biraq oǵan qylar esh aıla joq. Oǵan tıip ne qylasyń? Mazasyn ala berseń, ózińdi jep qoıady, oǵan eshteńe qyla almaısyń.
Tyshqan beıshara qaıǵyrsa da, úndemeı qoıypty. Biraq qalaı kegin alýdy oılaıdy.
Bir kúni seıildep kele jatsa, ininiń aýzynda jylannyń kún shýaqta jylynyp jatqanyn kóripti. Janynda bir kisi uıyqtap jatyr eken. Tyshqan baryp onyń murnyn tistep alyp, jylanǵa qaraı tura qashypty. Kisi oıanyp, tura qýady. Qarasa, aldynda jatqan jylandy kóredi. Tyshqannan munyń zııany kóbirek bolǵan soń, kisi jylandy óltirýge aldanyp qalypty da, tyshqandy qoıa beripti.
Sóıtip, kegi qaıtqan tyshqan óz inine kelip turypty.
