Qotyr torǵaı

4061
Adyrna.kz Telegram

Bir qotyr torǵaı sheńgelge qonyp otyrǵanda, jarasynyń qara qotyrlanǵan aýzyn sheńgeldiń tikenegi sydyryp ketipti.

Torǵaı ashýlanyp:
- Qap, bálem, seni eshkige aıtpasam ba! – dep, eshkige keledi.
- Eshki, eshki ana sheńgeldiń syldyrmaǵyn nege jemeısiń?
Eshki:
- Ony jemek túgil ózim laqtaı almaı jatyrmyn.
Torǵaı:
- Qap, bálem, seni qasqyrǵa aıtpasam ba? – deıdi de, qasqyrǵa barady.
- Qasqyr, qasqyr ana eshkini nege jemeısiń?
- Ony jemek túgil baıdyń jabaǵysyn jep taýysa almaı otyrmyn.
Torǵaı:
- Qap, bálem, seni jylqyshyǵa aıtpasam ba? – deıdi.
- Jylqyshy, jylqyshy ana qasqyrdy nege uryp almaısyń?
Jylqyshy:
- Ony uryp almaq túgil, ózimniń uıqym qanbaı júr.
Torǵaı:
- Qap, bálem, seni baıǵa aıtpasam ba! – deıdi.
- Baıeke, baıeke ana jylqyshyńdy nege sabamaısyń?
Baı:
- Ony sabamaq túgil ózimiz qospamdy taýysa almaı otyrmyn.
Torǵaı:
- Qap, bálem, seni tyshqanǵa aıtpasam ba! -dep, tyshqanǵa keledi.
- Tyshqan, tyshqan baıdyń qospasyn nege jemeısiń?
Tyshqan:
- Ony jemek túgil ózim inimdi qaza almaı jatyrmyn.
Torǵaı:
- Qap, bálem, seni balalarǵa aıtpasam ba! – deıdi.
- Balalar, balalar ana tyshqandy nege uryp almaısyńdar?
Balalar:
- Ony uryp almaq túgil ózimiz asyǵymyzdy oınaı almaı jatyrmyz.
Torǵaı:
- Qap, bálem, senderdi kempirge aıtpasam ba! – deıdi.
- Kempir, kempir ana balalardy nege urmaısyń?
Kempir:
- Olardy urmaq túgil ózim júnimdi sabaı almaı jatyrmyn.
Torǵaı:
- Qap, bálem, seni quıynǵa aıtpasam ba? – deıdi de quıynǵa barady.
- Quıyn, quıyn kempirdiń júnin nege ushyrmaısyń?
Quıyn soǵyp kempirdiń júnin ushyrady, kempir balalardy urady, balalar tyshqandy ustap alady,tyshqan baıdyń qospasyn túgisedi, baı jylqyshyny sabaıdy, jylqyshy qasqyrdy ustap alady. Qasqyr eshkini jeıdi, eshki sheńgeldiń syldyrmaǵyn jeı almaı, qotyr torǵaı sheńgelden óshin almaǵan eken deıdi.

 

Pikirler