Táýelsizdik alǵanda men on altyǵa jańa kelgen «shoq» edim. Keńes Odaǵy qalyptastyrǵan ádep pen ıbany qyzdar «sypyryp» tastap, «malvına» men «mını» kıip, aıaqtaryn (ıbaı-aı!) nekeı basyp shyǵa keldi. «Mını» men «bosonojka» kelgen soń qyzdardyń boıyn lıberalızm meńdep…
Qazaq qyzdarynyń tarıhy qyzyq
Sóıtkenshe bolǵan joq, bastaryn shálimen búrkegen «qara qarǵalar» qydıyp-qydıyp shyǵa keldi. Óte radıkaldy, qorqynyshty kórinedi. Kempir ekeni, qyz ekeni málim emes. Bular da ózgerip, qubylyp, álem-jálem bolǵan qazaq qyzdarynyń jańa toby eken. Sylqymdar buryn da bolǵan. Mynaý sý jańa túr, sony kelbet! Bular – qazaqtan shyqqan «ıslam qyzdary»! Álgi qazaqtan shyqqan «amerıka qyzdary» sııaqty.
Pah! Beý! Qyzdar óner shyǵardy! Qyzdar eki partııaǵa bólindi! Eń qyzyǵy – ustam joq. Ne sylq-sylq lıberal kúlki, ne álgindeı «hıdjap»! Saýatty, sabyrly jigitter mádenıetti, bilimdi, qylyqty jar taba almaı dal boldy. «Hıdjaptardyń» keıbiri bir kezde kózin ǵana qaldyrdy. Astapyralla! Alaıǵan eki-aq kóz! Kim qarap tur?! Qasyńyzda tursa, bir túrli «nervnıchıt» etedi ekensiz. Sóıtip on bes jyl ótti. Arty belgili boldy.
Qyzdardyń eki partııasy da jaqsylyq ákelmedi. Eki túrli qyz. Ortaq jeri – bilimsiz. «Amerıka qyzdary» qydyryp júrip «aqylyn tógip alǵan». «Islam qyzdaryna» bu dúnııań qyzyq emes: «O, o, dúnıe!» Al ana «amerıka qyzdarynyń» ishinde oqta-tekte ójetteri kezdesip jatady. Eń qyzyǵy – myna «hıdjaptar». Bulardy kóp jerde jumysqa da almaıdy. Namaz, oraza ýa ǵaırı dın hýkım! Odan basqa – ne estetıka, ne etıka – túk joq:
– Teatr ma?
– Aýlaq!
– Kıno…
– Kápirdiki!
– Foto…
– Ne úshin!?
– Sabaq oqyshy onda!
– Qyzyq emes!
«Endi ne kerek?» Saqaly ketpendeı, tobyǵy túrilgen, «ımany ıslam tazalyǵy ústinde qurylǵan» (óz sózderi) bek radıkal jigit kerek. Boıdaq júrgeni ımanyna aýyr. Oqysa saqabalar tarıhyn ǵana oqıdy. Qazaqstan tarıhynan góri arab tarıhy júz ese durys. Odan keıin qyzdaryna oramal salady. Mádenıet kókjıegi taryla kele, osy hıdjap qapasynda qalǵan. Mine, on bes jyldan soń bildik, toıdyq – bar qupııa osy eken! «Adam quqy» degen qasıetti uǵym, ollahı, nyspyǵa joq! «Oramal taǵa ma, taqpaı ma, balańyz óskende ózi sheshsin» deseń (bireýine aıtyp kórińiz ózińiz!), saıtannyń ózin kórgendeı alaıa qalady. Sóıtip, qazaq qyzdarynyń osy bir túri terror jasaıtyn qyzdardan aýmaı barady, tegi. Al álgi «saqaldarynyń tamyry júrekterinen bastalatyn» (óz sózderi) kúıeýleri balalaryn mektepke bergisi joq. Mektep oramal taqqyzbaı qyzdaryn buzady eken! Birinshi synyptan bastap! Ne degen seksýalnyı oılar, a?! Sóıtip, mektepke bara almaı otyrǵan balalar bar qazir. Qyp-qyzyl nadanǵa aınalǵan ata-anasyn emes, balany aıaısyń. Zárem zár túbine ketedi. Mektepte júrse de, áke-shesheleri oramalǵa búrkep tastaǵan oqýshylardy kórgende júregim eziledi, aýyrady.
Eh, qazaqtyń jelókpe qyzdary-aı! Aqyryn júrip, anyq basyńdarshy!
«Azattyq».
