Qazaqstanda jaqyn arada “erıktı” jäne “özın-özı qorǧau jasaqtary” ūǧymdary resmi türde zaŋ jüzınde bekıtıledı, dep habarlaidy “Adyrna” ūlttyq portaly Tengrinews.kz-ke sıltep.
Būl turaly Senat kuluarynda qorǧanys vise-ministrı Sūltan Kamaletdinov jurnalisterdıŋ saualyna jauap berdı.
“Būl özgerıster aldyn ala jasalǧan qadam ba?”- degen sūraqqa vise-ministr Kamaletdinov:
“Bır-aq sözben aitaiyn. İä, būl — aldyn alu şaralary. Keşe jasau mümkın bolmady, al on jyldan keiın keş boluy mümkın. Älemdegı jäne aimaqtaǧy geosaiasi jaǧdaiǧa bailanysty bız mūndai qadamǧa kelıp otyrmyz. Barlyǧyn äskerdıŋ baqylauyna alu mümkın emes”, — dep jauap berdı.
Onyŋ aituynşa, eger qazaqstandyqtar öz erıkterımen “üiın qorǧauǧa daiyn bolsa”, qorǧanys ministrlıgı būǧan qarsy bolmaidy.
“Būl — jaqsy niet”, — dedı ol.
Bügın Senat deputattary “Territoriialyq qorǧanys turaly” zaŋ jobasyn ekı oqylymda maqūldady. Zaŋ aiasynda äkımderge jaŋa ökılettıkter de berılgen. Olar öz öŋırlerındegı territoriialyq qorǧanysty basqaruǧa jauapty bolady.
Atap ötsek, būl zaŋ aiasynda engızıletın jaŋa ūǧymdar bar. “Özın-özı qorǧau jasaqtary” — äskeri jaǧdai kezınde jergılıktı äskeri basqaru organdary arqyly qūrylatyn azamattyq qūrylym.
Al “Erıktıler” — özın-özı qorǧau jasaqtaryna öz erkımen qosylǧan QR azamattary.
Ūqsas jaŋalyqtar
