2025 jyldyŋ 29 mamyry men 1 mausymy aralyǧynda Taşkent qalasyndaǧy «Jeŋıs saiabaǧy» memorialdyq keşenınde qorǧanys salasyndaǧy ekınşı innovasiialyq tehnologiialar festivalı – MSITF-2025 öttı. Is-şarada Özbekstanda öndırıletın zamanaui qaru-jaraq pen qosarly maqsattaǧy önımder köpşılıkke ūsynyldy, dep habarlaidy “Adyrna”.
Festivaldıŋ aşyluynda söilegen Özbekstannyŋ qorǧanys ministrı, general-maior Şuhrat Halmuhamedov soŋǧy jyldary eldıŋ Qaruly küşterı tübegeilı jaŋaryp, äskeri salaǧa zamanaui tehnologiialar belsendı engızılıp jatqanyn atap öttı. Ministrdıŋ aituynşa, jaŋa äskeri zauyttar aşylyp, būrynnan bar öndırıs oryndary qaita jaŋǧyrtylǧan. Qorǧanys-tehnikalyq salada 50 elmen ärıptestık ornatylyp, 30-dan astam şeteldık kompaniialarmen kelısımder jasalǧan. Nätijesınde, şyǧarylatyn önım türı 155 atauǧa jetken.
Festival aiasynda jastar arasynda bırqatar tehnikalyq baiqaular ūiymdastyryldy. Olardyŋ qatarynda «Kibersport», «Üzdık haker», «Dron jobalau», «3D modeldeu» jäne «Robottar şaiqasy» siiaqty baǧyttar bar. Būl jarystar jas mamandardy äskeri-injenerlık salalarǧa tartu jäne otandyq öndırısterge qyzyǧuşylyqty arttyru maqsatynda ötkızıldı.
Körmede erekşe oryn alǧan – ūşqyşsyz ūşu apparattary (drondar). Özbekstanda jasalǧan Lochin ūşqyşsyz barlau keşenı 5 000 metr biıktıkte 6 saǧat boiy ūşyp, 100 km qaşyqtyqtan basqaruǧa mümkındık beredı. Al Samum 80 atty dron-kamikadze 8 kelı jarylǧyş zatty 140 km/saǧ jyldamdyqpen 80 km qaşyqtyqqa jetkıze alady.
Sondai-aq, körmede jerüstı drondar – barlau maqsatyndaǧy AstroDog jäne jarylǧyş ne gumanitarlyq jük tasymaldai alatyn BUSTR platformasy da köpşılıkke ūsynyldy.
MSITF-2025 körmesınde alǧaş ret jeŋıl aviasiia salasynda jasalǧan bıregei joba – ekı adamǧa arnalǧan şaǧyn ūşaq tanystyryldy. Slovakiialyq Tomark kompaniiasy jäne Özbekstandaǧy serıktesterımen bırlesıp jasalǧan būl ūşaq 1200 km qaşyqtyqty toqtausyz ūşyp ötıp, 200 km/saǧ jyldamdyqpen qozǧala alady. Qūny – şamamen 300 myŋ AQŞ dollary.
Auyr äskeri tehnikalar da körmeden tys qalǧan joq. T-64 tankısı jaŋa qozǧaltqyşpen jabdyqtalyp, 125 mm zeŋbırekpen tolyqtyryldy. Sonymen qatar, Arslon bronetransporterlerı men jaŋartylǧan BM-21 «Buron» reaktivtı jüiesı körsetıldı.
Ūiymdastyruşylardyŋ aituynşa, festivaldıŋ basty maqsaty – qorǧanys salasyndaǧy innovasiialyq damudy körsetu jäne jastardy zamanaui äskeri-tehnikalyq mamandyqtarǧa tartu. Özbekstan äskeri doktrinasynyŋ qorǧanystyq sipatta ekenı de resmi türde eskertıldı.
