Qazaqstannyŋ belgılı jazuşysy, aqyn, jurnalist, audarmaşy, qoǧam qairatkerı Adolf Arsişevskii 87 jasynda dünieden öttı. Būl turaly Mädeniet jäne aqparat ministrlıgınıŋ baspasöz qyzmetı jariialady, dep habarlaidy “Adyrna”.
“Ol öz şyǧarmaşylyǧynda adamgerşılık, ruhaniiat pen tuǧan jerge degen süiıspenşılık taqyryptaryn tereŋ qozǧap, bırneşe buyn oqyrmanǧa oi saldy. Onyŋ qalamynan tuǧan tuyndylar qazaq jäne orys tılderınde jaryq körıp, ädebi qauymdastyqtyŋ joǧary baǧasyna ie boldy”, — delıngen ministrlıktıŋ habarlamasynda.
Adolf Alfonsovich Arsişevskii 1938 jyldyŋ 17 qaŋtarynda Prokopevs (Kuzbass) qalasynda düniege kelgen. Ömırınıŋ basym bölıgın Almaty qalasynda ötkızdı.
Ol 1960 jyly QazMU-dıŋ jurnalistika fakultetın, al 1981 jyly Mäskeudegı M. Gorkii atyndaǧy Ädebiet instituty janyndaǧy Joǧary ädebi kurstardy tämamdaǧan.
Eŋbek jolyn «Jazuşy» baspasynda redaktor bolyp bastaǧan. Sonymen qatar «Prostor» jurnalynda tehnikalyq redaktor, Respublikalyq jas körermender teatrynda jäne M. Lermontov atyndaǧy akademiialyq orys drama teatrynda ädebi bölımnıŋ meŋgeruşısı qyzmetterın atqardy.
Sondai-aq ol «Qazaqfilm» studiiasynda tüsırılgen alǧaşqy qazaqstandyq telehikaia — «Būrylystyŋ» bas redaktory, ärı «Jaŋa däuır» jurnalynyŋ bas redaktory bolǧan.
Adolf Arsişevskii poeziia jäne prozanyŋ 18 kıtabynyŋ avtory. Ol — Qazaqstan Jazuşylar odaǧynyŋ, PEN-klubtyŋ, Jurnalister odaǧynyŋ, Teatr qairatkerlerı odaǧy men Kinematografister odaǧynyŋ müşesı.
Sonymen qatar ol qazaq ädebietın orys tılıne audaruda eleulı eŋbek sıŋırdı. Atap aitqanda, Äkım Tarazidıŋ «Aiaz ben Oraz», «Dinastiia» povesterın, Baqqoja Mūqaidyŋ «Aqqu» povester jinaǧyn, Qalihan Ysqaqovtyŋ «Belovode jerınıŋ aŋyzy» romanyn, Qalihan Ysqaqov pen Şahimarden Qūsaiynovtyŋ «Būiryq küşınde qalady» pesasyn jäne Dulat İsabekovtıŋ «Ibılıstıŋ tory (Mihail Bulgakovtyŋ ömırı)» pesasyn orys tılıne audarǧan.
