Memleket basşysy Qasym-Jomart Toqaev mädeniet jäne öner qyzmetkerlerın marapattau räsımınde söz söiledı. Būl turaly Aqorda jazdy, dep habarlaidy “Adyrna”.
Mädeniet jäne öner qyzmetkerlerınıŋ käsıbi merekesı qarsaŋynda Aqordada saltanatty jiyn öttı. Prezident ūltymyzdyŋ bolmys-bıtımın saqtauǧa, halqymyzdyŋ ruhaniiatyn baiytuǧa zor üles qosyp jürgen sala qyzmetkerlerıne rizaşylyǧyn bıldırdı.
"Mädeniet – ūlttyŋ tölqūjaty. Jahan jūrty elımızdı, eŋ aldymen, önerımız arqyly tanyp bıledı. Bız – Ūly dalada tamyr jaiǧan bıregei mädeniettıŋ zaŋdy mūragerımız. Qazaq jerınen şyqqan qaitalanbas öner ielerınıŋ teŋdessız tuyndylary tūtas ūltty tärbieledı. Qazır töl mädenietımız dünie jüzıne tanylyp jatyr. Talantty muzykanttarymyz älemdık sahnalarda tabysty öner körsetıp jür. Qazaq kinogerlerı türlı halyqaralyq baiqaularǧa qatysyp, sarapşylardyŋ joǧary baǧasyna ie boluda. Elordamyzda Düniejüzılık köşpendıler oiyndary tabysty öttı. Aqtau qalasy türkı älemınıŋ mädeni astanasy bolyp jariialandy. Ruhani mūralarymyz sifrlyq formatqa köşırıle bastady. Taiauda ūltymyzdyŋ bır jarym myŋ än-küiı men folklorlyq mūrasy eŋ tanymal halyqaralyq platformalarǧa salyndy. Töl önerımız kreativtı industriia arqyly barynşa nasihattaluda", – dedı prezident.
Qasym-Jomart Toqaevtyŋ aituynşa, memleket öner salasyn örkendetuge ärdaiym erekşe män beredı. Öitkenı mädenietı ozyq eldıŋ ruhy biık bolady.
"Byltyrdyŋ özınde 45 jaŋa mädeniet nysany salyndy. Būl jūmys bolaşaqta da jalǧasyn tabady. Teatr – ruhaniiatymyzdyŋ negızgı tıregınıŋ bırı. Ūlttyq qūryltaidyŋ Burabaida ötken otyrysynda aimaqtaǧy teatrlardy damytu turaly naqty tapsyrma berıldı. Teatrlardyŋ köpşılıgı tolyq jaŋǧyrtudy qajet etedı. Keibırıne jaŋa ǧimarat kerek. Osy jūmysqa käsıpkerler men mesenattardy jūmyldyrǧan abzal. Būl – älemde keŋ taralǧan täjıribe. Mūndai jobalarǧa investisiia saluǧa daiyn azamattar az emes. Men biznes ökılderın ruhaniiatymyzdy damytu ısıne atsalysuǧa şaqyramyn", – dedı memleket basşysy.
Prezident elımızde ırgelı mädeniet oşaqtary köp ekenıne nazar audaryp, olar talai jyldan berı körermen qauymǧa taǧylymdy qoiylymdar ūsynyp kele jatqanyn jetkızdı.
"Osy oraida Biken Rimova atyndaǧy qazaq drama teatryna, Almaty qalasyndaǧy Memlekettık quyrşaq teatryna jäne Ǧarifolla Qūrmanǧaliev atyndaǧy filarmoniiaǧa akademiialyq märtebe beru qajet dep sanaimyn. Būl qadam mädeniet mekemelerınıŋ jūmysyna tyŋ serpın bererı sözsız", – dedı memleket basşysy.
