Täjıkstan prezidentı Emomali Rahmon äleumettık jelılerdegı laik pen basqa da belgıler üşın qylmystyq jauapkerşılıktı alyp tastaityn zaŋǧa qol qoidy, dep habarlaidy "Adyrna" ūlttyq portaly Ferǧana agenttıgıne sıltep.
Zaŋ «Täjıkstan Respublikasynyŋ Qylmystyq kodeksıne tolyqtyrular engızu turaly» dep atalady. Qūjattyŋ tolyq mätını resmi baspasöz betterınde jariialanatyn bolady.
Būl şeşımge deiın, 2023 jyldyŋ qazan aiynda, memleket basşysy ışkı ıster ministrlıgıne azamattardy laik basqany üşın qudalaudy toqtatudy tapsyrǧan edı. Ol mūndai aiyptaulardy negızsız dep atap, qūqyq qorǧau organdarynyŋ mūndai äreketterıne toqtau salu qajettıgın aitqan bolatyn.
2025 jyldyŋ säuırınde būl bastamany Täjıkstan bas prokuraturasy köterıp, zaŋ jobasy parlamenttıŋ tömengı palatasynda maqūldandy. Naqtylai ketsek, Qylmystyq kodekstegı 179(3)-bap (terroristık äreketterge şaqyru) jäne 307(1)-bap (ekstremistık äreketke şaqyru) siiaqty baptarǧa "laik nemese basqa belgı basudy qospaǧanda" degen tolyqtyrular engızıldı. Atalǧan baptar boiynşa būrynǧy jazalar 15 jäne 12 jylǧa deiın bas bostandyǧynan aiyrudy qarastyratyn.
Bas prokuraturanyŋ bırınşı orynbasary Umed Karimzoda sottalǧandar boiynşa statistikany keltırdı. Naqtyraq, 2025 jyldyŋ säuır aiyna deiın internettegı beinerolikterge lüpıl basqany nemese ekstremistık sipattaǧy pıkır jazǧany üşın 1507 azamat türmede otyrǧan.
Būǧan deiın de Täjıkstanda mūndai ıster tırkelgen. 2018 jyly Vahş audanynyŋ tūrǧyny Alidjon Şaripov oppozisiialyq partiianyŋ beinematerialyna lüpıl basqany üşın 9,5 jylǧa sottalǧan. 2019 jyly Pendjikent qalasynyŋ būrynǧy imamy äleumettık jelıde ūnatu belgısın basqany üşın 1 jyl 4 ai türmege qamaldy.
