Almatydaǧy qoǧamdyq kölıkte bolǧan töbeleske qatysty tergeu barysynda jaŋa derekter belgılı boldy. Polisiia janjalǧa qatysqan üş adamdy ūstaǧannan keiın, olardyŋ bırınıŋ basqa da qylmystarǧa qatysy boluy mümkın ekenın anyqtaǧan, dep habarlaidy "Adyrna".
Būǧan deiın äleumettık jelılerde avtobusta bırneşe er adamnyŋ janjaldasyp, töbeles şyǧarǧan sätı tüsırılgen video taraǧan edı. Kadrlarda jolauşylardyŋ közınşe bolǧan janjal kezınde er adamdardyŋ bırınıŋ qolynan pyşaq körıngen.
Oqiǧadan keiın polisiia üş adamdy ūstap, janjaldyŋ män-jaiyn anyqtauǧa kırıstı. Tekseru kezınde 40 jastaǧy küdıktınıŋ būǧan deiın ūrlyq jasaǧany üşın sottalǧany belgılı bolǧan.
Sonymen qatar, tergeu onyŋ töbeleske deiın bırneşe kün būryn Jetısu audanynda velosiped ūrlaǧan boluy mümkın ekenın körsettı.
Jedel-ızdestıru şaralary barysynda küdıktınıŋ Almatydaǧy bırneşe janarmai qūiu stansiiasynda jasalǧan ūrlyqtarǧa da qatysy boluy yqtimal ekenı anyqtalǧan. Beinebaqylau jazbalarynda er adamnyŋ JQS aumaǧyna kırıp, ainalasyn baqylaǧannan keiın türlı tauarlardy alyp, oqiǧa ornynan ketıp qalǧany körınedı.
Polisiia mälımetınşe, osyndai jaǧdailardyŋ bırınde janarmai qūiu stansiiasynyŋ qyzmetkerlerı ony toqtatuǧa äreket jasaǧan. Sol kezde er adam pyşaq şyǧaryp, jūmysşylarǧa qoqan-loqy körsetken.
Qazırgı uaqytta atalǧan beinejazbalar men özge de dälelder qylmystyq ıske tırkeldı. Tergeu barlyq epizodtyŋ män-jaiyn anyqtap, küdıktınıŋ osyǧan ūqsas basqa qylmystarǧa qatysy bar-joǧyn tekserıp jatyr.
