Şymkent qalasynda tūrǧyn üige mūqtaj azamattardy baspanamen qamtamasyz etu baǧytyndaǧy jūmystar jüielı türde jürgızılıp keledı. Bügınde tūrǧyn üi alu tızımınde tırkelgen azamattardyŋ jalpy sany 53 297 adamdy qūraidy. Olardyŋ 1 754-ın jetım jäne ata-anasynyŋ qamqorlyǧynsyz qalǧan balalar, 16 503-ın köpbalaly otbasylar, 18 579-yn halyqtyŋ äleumettık jaǧynan osal toby, 16 438-ın memlekettık qyzmetşıler, biudjettık ūiym jäne äskeri qyzmetşıler, 23-ın jalǧyz tūrǧyn üiı apatty jaǧdaida dep tanylǧan azamattar qūrap otyr. Būl derekter bızge qaladaǧy baspana mäselesınıŋ qanşalyqty özektı ekenın körsetedı.
Ötken jyly tūrǧyn üi kezegınde tūrǧan 1 000 azamatqa arendalyq päter beru josparlanǧan bolatyn. Onyŋ 803-ı öz ielerıne tabystalyp, qalǧan päterler biyl paidalanuǧa berıledı dep kütılude.
2019 jyldan berı elımızde Astana, Almaty jäne Şymkent qalalarynda jūmys ısteitın jastarǧa arnalǧan «satyp alu qūqyǧynsyz jalǧa berıletın tūrǧyn üi» baǧdarlamasy ıske asyrylyp keledı. Atalmyş baǧdarlama jastardyŋ öz betımen ömır bastauyna, eŋbek etuıne jäne äleumettık jaǧdaiynyŋ jaqsaruyna da ülken qoldau körsetıp otyr.
Şymkent qalasy boiynşa osy uaqytqa deiın 3 849 jas otbasy 5 jyl merzımge tūrǧyn üimen qamtamasyz etıldı.
Odan bölek, 2024 jyly memlekettık tūrǧyn üi baǧdarlamalarynyŋ «2-10-20» jäne «5-10-20» baǧyttary boiynşa jeŋıldetılgen nesielık negızde 1 577 päter ielerıne tapsyryldy. Būl jobalar azamattarǧa tömen paiyzben, ūzaq merzımge nesie alyp, baspanaǧa qol jetkızuge mümkındık beredı. Äsırese, tabysy ortaşa deŋgeidegı azamattar üşın mūnyŋ tiımdı ärı qoljetımdı ekenın aita ketu kerek.
Būiyrtsa, biyl qalalyq qūrylys basqarmasy tarapynan 3 592 päterlı 57 tūrǧyn üidıŋ qūrylysy jürgızılmek. Būl körsetkış – Şymkent qalasynyŋ äleumettık-ekonomikalyq damu qarqyny men tūrǧyndardy tūrǧyn üimen qamtu strategiiasynyŋ naqty jüzege asyp jatqanyn körsetedı.
Qoryta aitqanda, memlekettık baǧdarlamalar aiasynda jüzege asyp jatqan jobalar – qala halqynyŋ tūrmysyn jaqsartuǧa jasalǧan maŋyzdy qadamdar. Şymkent qalasynda tūrǧyn üimen qamtu mäselesınıŋ kezeŋ-kezeŋımen şeşıluı – tūrǧyndardyŋ äl-auqatyn arttyryp qana qoimaidy. Sonymen qatar, qala infraqūrylymynyŋ da tūraqty damuyna jol aşatyny sözsız.
Ūqsas jaŋalyqtar
