Pyshaq negizi eki bólikten turady. Olar: basy jáne saby. Basynyń úshkir jaǵy ushy, oǵan qarsy jaǵy-jetesi. Pyshaqtyń kesetin, pishetin ótkir jaǵy júzi, al onyń qarsy jaǵy syrty dep atalady. Qazaqta «pyshaq syrty» degen qalyńdyq ólshemi bar. Pyshaqty oń qolǵa júzin tómen qarata ustaǵandaǵy sol qol jaqtaǵy qaptaly oń qaptal bolady. Oń qaptalyna arnaıy qyr qaldyra soǵylady. Ony qazınek dep ataıdy. Qazınek pyshaqtyń qyryn qalyńdatyp, qataıtý úshin qajet.
Jete pyshaq sabynan sál uzynyraq alynyp, saptyń dúmine (túbine) toıtarylsa, kúsh túsken kezde, basy sabynan ajyramaıdy. Jetesi qysqa bolsa, pyshaq sabyn saǵaǵyna jaqyn tustan tesip, jetesimen birge jalǵyz shegemen shegeleıdi. Ony «jetim shege» dep ataıdy. Sebebi, mal baýyzdaǵanda pyshaq jetesi sabynan sýyrylyp ketse, obal bolady. Jetesinen shegelengen pyshaqty qazaq qaljyńdap«erkek pyshaq» nemese «pishtirilgen» deıdi. Pyshaq sabynyń túbine jetesi toıtarylǵan soń, metall qursaý kıgiziledi. Ol órnekpen bezendiriledi.
