Ereýil atqa er salmaı,
Egeýli naıza qolǵa almaı,
Eńký-eńký jer shalmaı,
Qońyr salqyn tóske almaı,
Tebingi terge shirimeı,
Terligi maıdaı erimeı,
Alty malta as bolmaı,
Ózińnen týǵan jas bala
Saqaly shyǵyp jat bolmaı,
At ústinde kún kórmeı,
Asharshylyq, shól kórmeı,
Aryp-ashyp jol kórmeı,
Ózegi talyp et jemeı,
Er tósekten bezinbeı,
Uly túske urynbaı,
Tún qatyp júrip tús qashpaı,
Tebingi teris taǵynbaı,
Temirqazyq jastanbaı,
Qý tolaǵaı bastanbaı,
Erlerdiń isi biter me?!
…
Bekinip sadaq asynbaı,
Birindep jaýdy qashyrmaı,
Biltelige dop salmaı,
Qoramsaqqa qol salmaı,
Qozy jaýyryn oq almaı,
Atqan oǵy joǵalmaı,
Baldaǵy altyn qurysh bolat
Baldaǵynan qanǵa boıalmaı,
Qasarysqan qaryndasqa
Qandy kóbik jutqyzbaı,
Halyqqa tentek atanbaı,
Erlerdiń isi biter me?!
