Óskemendegi dúkenderdiń birinde «Z» jáne «V» belgileri bar fýtbolkalar emin-erkin satylyp jatyr. Bul týraly belsendi Syrym Itqulov Telegram kanalynda jazdy, dep habarlaıdy «Adyrna» tilshisi.
«Almatyda terezesinde osyndaı belgileri bar júrgizýshilerdi ustap jatsa, Óskemendegi dúkenderdiń birinde mynadaı kıimder satylyp jatqany týraly fotolar keldi. Aıtarǵa sózim joq.
Bul bireýdiń saıası kózqarasyn bildiretin jaı ǵana áripter emes, bul – soǵystyń jáne ózge bir elge basyp kirýdiń belgisi. Osy úshin jaýapkershilik qarastyrylýy kerek.
Reseıdiń ózinde bul belgilerden bas tartyp jatqany úshin qamaýǵa alyp jatyr. Al depýtattar balasy VPN qoldanǵany úshin ata-analardy túrmege qamaıtynyn aıtyp qorqytady», - dep jazdy belsendi.
Aıta keteıik, Ýkraınada soǵysyp jatqan Reseı qarýly kúshteri ózderiniń sımvoly retinde «Z» jáne «V» belgilerin qarastyrady.
“Adyrna” ulttyq portaly
