Ūlttyq kıtap künı alǧaş ret atalyp ötude. Prezident qazaqstandyqtardy qūttyqtady

Memleket basşysy Qasym-Jomart Toqaev qazaqstandyqtardy 23 säuır — Ūlttyq kıtap künımen qūttyqtady, dep habarlaidy "Adyrna" ūlttyq portaly Aqordaǧa sılteme jasap. Byltyr Atyrauda ötken Ūlttyq qūryltaida Prezident Ūlttyq kıtap künın belgıleu jönınde tapsyrma bergen edı. Soǧan säikes, biyldan bastap 23 säuır – Ūlttyq kıtap künı bolyp belgılendı. "Biyl alǧaş ret atalyp jatqan Ūlttyq kıtap künı qūtty bolsyn! Būl – bılımpazdyq, ızdenımpazdyq, kıtapqūmarlyq siiaqty igı qasietterdı därıpteitın kün. Kıtap oqyǧan ūrpaq ozyq oily bolady. Sapaly ūlt osyndai qūndylyqtar arqyly qalyptasady", – delıngen Prezidenttıŋ qūttyqtauynda. Sondai-aq, bügın - Düniejüzılık kıtap jäne avtor qūqyǧyn qorǧau künı. Būl atauly kün 1996 jyly UNESCO şeŋberınde Uiliam Şekspir (1564-1616), Migel de Servantes (1547-1616) jäne jazuşy-tarihşy İnko Garsilasode la Vegany (1539-1616) eske alu maqsatynda bekıtılgen. Üş jazuşy da 1616 jylǧy säuırdıŋ 23-ınde ömırden ötken. Qazır osy atauly merekege orailastyryp, barlyq örkeniettı elderde kıtap järmeŋkelerı, körmeler men festivaldar ötedı. Halyqaralyq atauly künnıŋ maqsaty — kıtap pen onyŋ avtorlaryna qūrmet körsetu ǧana emes, halyqty aǧartu, mädeni dästürler sanasyn damytu.