Ýkraına prezıdenti Vladımır Zelenskıı elde áskerı jaǵdaı rejımi men jalpy mobılızaııa merzimin 90 kúnge – 9 mamyrdan 6 tamyzǵa deıin uzartý týraly zańǵa qol qoıdy. Bul týraly búgin ýkraınalyq BAQ zań jobalaryna (№13172 jáne №13173) silteme jasap jarııalady, dep habarlaıdy “Adyrna” ulttyq portaly.
«RBK-Ýkraına» onlaın-basylymy eske salǵandaı, Reseı soǵysty bastaǵaly beri Ýkraınada áskerı jaǵdaı merzimi 15-ret uzartylyp otyr. Tıisti zań jobalaryn Zelenskıı Joǵarǵy Radaǵa 15 sáýirde joldaǵan. Al kelesi kúni, 16 sáýirde, parlament olardy qabyldady.
Áskerı jaǵdaı rejımi Ýkraına bıligine birqatar shekteýler engizýge múmkindik beredi.
«Onyń áreketi kezinde el ishinde erkin júrip-turýǵa jáne kólik qozǵalysyna – Ýkraına azamattaryna da, sheteldikterge de – shekteý qoıylýy múmkin», – dep jazady «RBK-Ýkraına».
Sonymen qatar, memleket belgili bir sanattaǵy azamattar úshin eńbek mindetkerligin nemese qoǵamdyq paıdaly jumystardy engize alady. Ásker qajettiligi úshin múlikti májbúrlep tartyp alýǵa da ruqsat beriledi.
Budan bólek, áskerı jaǵdaı kezeńinde elde Ýkraınanyń egemendigine qaýip tóndiretin saıası partııalardyń qyzmetine tyıym salý, mıtıngiler men jappaı sharalar ótkizýge shekteý qoıý qarastyrylǵan.
Áskerı jaǵdaı rejıminiń kúshinde bolýyna baılanysty Ýkraınada 2024 jylǵa josparlanǵan prezıdent saılaýy ótkizilgen joq.
