Belgili jýrnalıst jáne azamattyq belsendi Luqpan Ahmedıarovty polıııa qyzmetkerleri túsiniksiz jaǵdaıda ustady, dep habarlaıdy "Adyrna" ulttyq portaly Ulysmedıaǵa siltep.
Jýrnalıst áleýmettik jelidegi paraqshasyna túsirgen vıdeoda ózin polıııa kóliginiń ishinde kúshtep alyp bara jatqanyn aıtyp úlgergen. Onyń aıtýynsha, quqyq qorǵaý organdary eshqandaı resmı qujat kórsetpeı, ony jáne áriptesteri Raýl men Erkebulandy da ustaýǵa árekettengen.
"Jańa ǵana túsirilim júrgizip jatqanbyz. Meni jańa ustady. Polıııa qyzmetkerleri kúshtep kólikke otyrǵyzdy. Eshqandaı túsinik bererlik qaǵaz kórsetken joq. Meniń ústimnen qylmystyq is qozǵalǵanyn aıtty. Qazir qaıda apara jatqandaryn da naqty bilmeımin", – dedi Ahmedıarov.
Jýrnalıst óziniń ustalýyn jýyrda jarııalaǵan maqalasymen baılanystyrady. Ol maqalada Reseıge aldanyp, keıin Ýkraınadaǵy soǵysqa májbúrli túrde tartylǵan qazaqstandyqtar týraly baıandalǵan. Bul maqala jarııalanǵannan keıin, Qazan qalasyndaǵy Qazaqstan konsýldyǵy aqparatty joqqa shyǵarǵan bolatyn.
"Olardyń týystary maǵan habarlasyp, soǵysqa barýǵa májbúrlep jatqandaryn aıtty. Bálkim, meniń ustalýym osy jaǵdaımen baılanysty bolar", – dedi Ahmedıarov.
Luqpan Saılaýuly Ahmedıarov – tanymal jýrnalıst, azamattyq belsendi. Ol 1975 jyly Batys Qazaqstan oblysynda dúnıege kelgen. Jýrnalıstıka salasyna 2001 jyly qadam basqan. «Ýralskaıa nedelıa» gazetinde jumys istegen ol óziniń kásibı qyzmeti barysynda birneshe ret qysym men shabýyldarǵa ushyraǵan. 2012 jyly belgisiz bireýler oǵan qarýly shabýyl jasap, segiz pyshaq jaraqatyn salǵan. Sol jyly ol Shekarasyz reporterlar uıymynyń halyqaralyq syılyǵyna ıe bolǵan.
