Qazaqstan premer-ministrı Oljas Bektenov eŋbek jäne halyqty äleumettık qorǧau ministrlıgıne biylǧy 1 jeltoqsanǧa deiın äleumettık qoldau şaralarynyŋ bıryŋǧai standartyn äzırleudı tapsyrdy, dep habarlaidy "Adyrna" ūlttyq portaly.
«Eŋbek ministrlıgı müddelı memlekettık organdarmen jäne äkımdıktermen bırlesıp, äleumettık qoldau şaralarynyŋ barlyq öŋırge arnalǧan bıryŋǧai standartyn daiyndauy qajet. Barlyq kümändı ärı tiımsız äleumettık tölemder men järdemaqylardy alyp tastau kerek. Bız äleumettık ädılettılıktı saqtap, masyldyq piǧyldy azaitu üşın naqty şaralar qabyldaimyz. Ükımettıŋ mındetı – barlyǧyna bırdei jaǧdai jasau, al azamattar jūmys ıstep, özın jäne otbasyn qamtamasyz etuge ūmtyluy tiıs», – dedı ol Ükımet otyrysynda.
Sonymen qatar, premer sifrlandyru jäne jasandy intellekt tehnologiialaryn engızu arqyly memlekettık qyzmetterdı baqylaudyŋ jaŋa ädısterın äzırleu qajettıgın atap öttı. Osyǧan bailanysty Bektenov 1 qaraşaǧa deiın eŋbek ministrlıgı janynan äleumettık salanyŋ bıryŋǧai sifrlyq platformasyn ıske qosudy tapsyrdy.
Būdan bölek, memlekettık organdarǧa Äleumettık kodekske äleumettık audit tetıkterın engızudı közdeitın zaŋ jobasyn jedeldetıp kelısu mındetteldı.
Aita keteiık, būǧan deiın Prezident Qasym-Jomart Toqaev halyqqa Joldauynda Ükımet soŋǧy on bes jyl boiy masyldyq pen äleumettık alaiaqtyqty qoldap kelgenın synǧa alǧan edı.
