AQŞ prezidentı Donald Tramp Kanadadan importtalatyn bırqatar tauarǧa qosymşa 50 paiyzdyq kedendık baj salyǧyn engızu turaly jarlyqqa qol qoidy, dep habarlaidy "Adyrna" ūlttyq portaly VVS-ge sıltep.
Aq üidıŋ mälımetınşe, jaŋa şaralar amerikalyq öndıruşıler men biznestıŋ müddesın qorǧauǧa baǧyttalǧan. Jarlyqta Kanada AQŞ-pen salystyrǧanda keibır elderge tiımdırek sauda şarttaryn ūsynyp, negızsız ärı kemsıtuşılık sipattaǧy şekteuler qoldanyp otyrǧany aitylǧan. Jaŋa baj salyǧy 19 tamyzdan bastap küşıne enedı.
Sarapşylardyŋ baǧalauynşa, būl şeşım AQŞ pen Kanada arasyndaǧy sauda qatynastaryndaǧy şielenıstı küşeituı mümkın. Jaŋa tarifter şarap, hokkei taiaqşalary, sement siiaqty bırqatar tauarlarǧa qoldanylady. Al energiia resurstary, kalii tyŋaitqyştary, strategiialyq maŋyzy bar mineraldar men balyq önımderı jaŋa baj salyǧynan bosatylǧan.
Sonymen qatar AQŞ Kanadadan importtalatyn bolat, aliuminii jäne mysqa būrynnan qoldanystaǧy 15–50 paiyzdyq tarifterdı saqtap qaldy. Būdan bölek, kanadalyq qylqanjapyraqty aǧaş materialdaryna 35 paiyzdyq, al AQŞ-ta öndırılmegen avtokölık bölşekterıne 25 paiyzdyq tarif küşınde qalady.
Öz kezegınde Kanada da AQŞ-tan äkelınetın bolatqa, aliuminiige jäne avtokölıkterge 25 paiyzdyq ötemaqy baj salyǧyn qoldanyp keledı.
