22 säuırde Energetika ministrı Erlan Aqkenjenov Resei arqyly Germaniiaǧa jetkızeletın mūnai tranzitınıŋ toqtatyluy turaly aqparatty rastady, dep habarlaidy «Adyrna» tılşısı.
Ol Reseidıŋ resmi mälımdeme jasamaǧanyn mälımdemedı.
«Beiresmi derekközder arqyly būnyŋ şyndyq ekenın bılıp otyrmyz. Mamyr aiynda Atyrau-Samara arqyly ärı qarai «Dostyq» mūnai qūbyrymen «Şved» zauytyna baǧyttalatyn tranzit bızde nöldık deŋgeide. Resei tarapy, taǧy da beiresmi aqparatqa süiensek, qazaqstandyq mūnaidy aidauǧa tehnikalyq mümkındıktıŋ joq ekenın mälımdeude. Būl, sırä, jaqynda reseilık infraqūrylymǧa jasalǧan soqqylarmen bailanysty boluy mümkın. Men osyndai boljam jasap otyrmyn», — dedı Aqkenjenov Astanada ötken ekologiialyq sammit kuluarynda.
Ministr ekınşı toqsanǧa arnalǧan indikativtık körsetkışter de nöldık kölemdı qarastyratynyn atap öttı.
«Degenmen, kei ärıptesterımmen söilestım. Esımderın atamai-aq qoiaiyn. Tehnikalyq mümkındık mäselesı şeşılgen boida qazaqstandyq mūnai tranzitı qaita jandanady», — dep sendırdı ol.
Eske salaiyq, 21 säuırde Resei 1 mamyrdan bastap «Dostyq» qūbyry arqyly Qazaqstannan Germaniiaǧa mūnai eksportyn toqtatudy josparlap otyrǧany belgılı boldy. Būl turaly Reuters agenttıgıne salalyq üş derekköz habarlaǧan. Olardyŋ mälımetınşe, jetkızılımnıŋ jaŋartylǧan kestesı Qazaqstan men Germaniiaǧa joldanǧan.
Qazaqstan 2023 jyldan berı Germaniiaǧa mūnaidy «Dostyq» qūbyry arqyly jetkızıp keledı. 2025 jyldyŋ qorytyndysy boiynşa jetkızılım kölemı 2,1 mln tonnany qūrady, al 2026 jyly ol 2,5 mln tonnaǧa deiın ösedı dep kütılude. Qazaqstan mūnaiy «Özen — Atyrau — Samara» magistraldyq mūnai qūbyry arqyly tasymaldanyp, keiın «Transneft» jüiesıne tüsedı jäne ärı qarai Germaniiadaǧy Şvedt qalasyndaǧy mūnai öŋdeu zauytyna jetkızu üşın «Adamova zastava» tapsyru punktıne baǧyttalady. Şikızat Qaraşyǧanaq, Qaşaǧan jäne Teŋız ken oryndarynan KEBCO brendımen jetkızıledı.
