Atyraýda týdy ózgertip sýretke túsken qyzdarǵa sot úkimi shyqty, dep habarlaıdy “Adyrna” ulttyq portaly «Moı Gorod» basylymyna siltep.
Sot muny "usaq buzaqylyq" dep tanyp, qyzdardyń bireýin 15 táýlikke qamady.
"Ákimshilik quqyq buzýshylyq týraly kodekstiń babyna sáıkes, mundaı áreketke 20 AEK mólsherinde aıyppul nemese 5 táýlikten 15 táýlikke deıin ákimshilik qamaýǵa alý jazasy qarastyrylǵan", – deıdi Atyraý qalasynyń ákimshilik quqyq buzýshylyqtar jónindegi mamandandyrylǵan soty.
Buǵan deıin sot úkimimen qyzdardyń biri 15 táýlikke qamalǵan edi. Onyń jazasyn aýyrlatqan jaıt álgindeı áreketke jasóspirimdi tartqan jáne top bolyp áreket etýge muryndyq bolǵan.
Ekinshi qyzǵa 78 640 teńge kóleminde aıyppul salyndy. Úshinshi, kámelet jasyna jetpegen qyzdyń ata-anasy da 39 myń teńge aıyppul arqalady. Fotoda tórtinshi qyzdyń qandaı jaza alǵany belgisiz.
Eske salsaq, Atyraýdaǵy muz aıdynynda tórt boıjetken qara nıqab kıip, ózgertilgen Qazaqstan týymen sýretke túsip, qoǵam narazylyǵyn týdyrǵan edi.
