28 naýryz kúni Mıanmada bolǵan jer silkinisi saldarynan qaza tapqandar sany eki myńnan asyp ketti. Bul týraly jergilikti bılik málimdedi, dep habarlaıdy “Adyrna” ulttyq portaly Euronews-ke siltep.
Jergilikti bıliktiń málimetteri boıynsha, shamamen 3900 adam jaraqat aldy, taǵy 270 adam joǵalyp ketken. Elde bir apta ulttyq aza tutý jarııalandy.
Qutqarýshylar qırandylardan adamdardy shyǵarýda, biraq tiri qalǵandary sırek. Jergilikti BAQ-tyń habarlaýynsha, máıitter aǵynmen jetkizilýde, al qala krematorııleri olardy jaǵýǵa úlgermeı jatyr.
Magnıtýdasy 7,7 bolatyn jer silkinisi juma kúni tústen keıin bolyp, el astanasy Neıpıtaýda jáne Mıanmanyń ekinshi úlken qalasy Mandalaıda jappaı qıraýǵa ákeldi. Myńdaǵan musylman Ramazan orazasyn aıaqtaý úshin duǵa etken ǵımarattar, turǵyn úıler, kópirler, meshitter qıratyldy.
Qutqarýshylardyń jumysyn apat aımaǵyndaǵy búlingen joldar, baılanystyń nashar nemese múlde joq bolýy, aýa temperatýrasynyń joǵary bolýy, elde azamattyq soǵys júrip jatqany qıyndatty. Senbi kúni qarýly kóterilisshiler birqatar aımaqtarda soǵys áreketterin toqtatqanyn málimdedi.
Úısiz qalǵan turǵyndar jáne aftershoktardan qorqatyndar kóshede uıyqtaýǵa májbúr boldy. BUU gýmanıtarlyq apat týraly jáne aýyzsý, azyq-túlik, dári-dármek jetispeýshiligi týraly aıtty.
Dúnıejúzilik densaýlyq saqtaý uıymy Mıanmaǵa «kómek kórsetý, aýrýlardyń taralýyn boldyrmaý jáne negizgi medıınalyq qyzmetterdi qalpyna keltirý» úshin 8 mıllıon dollar jınaý týraly shuǵyl shaqyrý jarııalady.
AQSh Geologııalyq qyzmetiniń baǵalaýynsha, apattan qaza tapqandar sany 10 myńnan asyp, ekonomıkalyq shyǵyndar eldiń JIÓ-niń 100%-ynan kem bolmaıdy.
Jer silkinisi Qytaı men Taılandta da sezildi. Jergilikti bılik 18 adamnyń qaza tapqany týraly habarlady. Bangkokta bıik ǵımarattyń qulaǵan jerinde qutqarý jumystary jalǵasýda, ǵımarattyń astynda ondaǵan adam bolýy múmkin.
