Qazaqstan musylmandar dinı basqarmasy (QMDB) áleýmettik jelilerde dinı ýaǵyz aıtyp, úgit-nasıhat júrgizetinderdi tekserýdi josparlap otyr. Basqarma ókilderiniń aıtýynsha, dinı dáristerdi tek resmı ustazdar men ımamdar júrgizýi kerek, dep habarlaıdy “Adyrna” ulttyq portaly.
QMDB baspasóz hatshysy Aǵabek Qonarbaıulynyń málimdeýinshe, dinı saýat berý jaýapkershilikti talap etedi, al durys emes aqparat taratýdyń saldary aýyr bolýy múmkin.
Alaıda áleýmettik jelide dinı bilim berýmen aınalysatyn keıbir blogerler bul bastamaǵa qarsy. Olardyń pikirinshe, onlaın dárister halyqqa paıdaly, al tyńdaýshylary duǵalardyń kómekteskenin aıtyp, alǵystaryn bildirýde.
QMDB bolashaqta áleýmettik jeli arqyly dinı bilim taratatyn azamattardy baqylaýǵa alyp, tekserý júrgizbek.
