3-4 sáýir kúnderi Ózbekstannyń Samarqan qalasynda «Ortalyq Azııa — Eýropa Odaǵy» alǵashqy sammıti ótedi. Sammıtke Ózbekstan prezıdenti Shavkat Mırzııoev tóraǵalyq etedi, dep habarlaıdy ”Adyrna” ulttyq portaly.
Is-sharaǵa Eýropalyq keńestiń prezıdenti Antonıý Koshta men Eýropalyq komıssııanyń prezıdenti Ýrsýla fon der Lıaıen, sondaı-aq Qazaqstan prezıdenti Qasym-Jomart Toqaev, Qyrǵyzstan, Tájikstan jáne Túrikmenstan basshylary qatysady.
Sammıtte Ortalyq Azııa men Eýroodaq arasyndaǵy kólik-logıstıka, strategııalyq shıkizat, ekologııalyq taza energııa kózderi sekildi yntymaqtastyq máseleleri qarastyrylady.
«Biz shıelenis jaǵdaıynda ómir súrip jatyrmyz. Osy oraıda, Eýroodaq úshin jalǵyz sheshim — beıbitshilik pen ózara órkendeýge negizdelgen seriktestik ornatý», – dedi Eýropalyq keńestiń prezıdenti Antonıý Koshta.
Eske sala keteıik, byltyr qyrkúıekte Ózbekstan basshysy «Ortalyq Azııa — Eýroodaq» sammıtin óz elinde ótkizýdi usynǵan bolatyn. Sammıt qarsańynda Ózbekstandaǵy Ortalyq Azııa halyqaralyq ınstıtýtynda Eýropa men Ortalyq Azııadaǵy saıası taldaý ortalyqtarynyń forýmy ótti.
