«Qazaqmys» korporasiiasy öz ken oryndarynda qauıptı aimaqtardyŋ anyqtaluyna bailanysty öndırıstı kezeŋ-kezeŋımen toqtatatynyn mälımdedı, dep habarlaidy “Adyrna” ūlttyq portaly.
Kompaniianyŋ habarlauynşa, öndırıstık nysandarda jazataiym oqiǧalardyŋ jiılep ketuı qauıpsızdık şaralaryn qaita qaraudy talap etıp otyr. Osyǧan bailanysty barlyq joǧary qauıp deŋgeiı bar tehnologiialyq üderıster uaqytşa toqtatylyp, barlyq jūmys türlerıne qauıpsızdık erejelerınıŋ saqtaluyna jan-jaqty tekseru jürgızıledı. Tek barlyq būzuşylyqtar joiylǧannan keiın ǧana öndırıs qaita jandanady.
Kompaniia jospardan tys tekserıs jürgızıp, injenerlık-tehnikalyq qyzmetkerlerdı qaita attestasiiadan ötkızudı, jerasty nysandaryn qadaǧalaudy jäne qūtqaru jabdyqtarynyŋ daiyndyǧyn tekserudı qolǧa alady. Sonymen qatar, qyzmetkerlerdıŋ önerkäsıptık qauıpsızdık tehnikasy men tötenşe jaǧdailardaǧy äreket etu algoritmderın bılu deŋgeiı baǧalanatyn bolady.
Kelesı öndırıs oryndary uaqytşa jabyldy:
20 nauryz – Şyǧys-Jezqazǧan, Abyz, Saiaq, Qoŋyrat rudnikterı; Nūrqazǧan, Qaraǧaily, Balqaş baiytu fabrikalary jäne jöndeu-mehanikalyq basqarmasy.
21 nauryz – Oŋtüstık-Jezqazǧan, Aqbastau, Hadjiqonǧan, Şatyrköl, Jaisan rudnikterı.
22 nauryz – Batys-Jezqazǧan rudnigı.
23 nauryz – Jylandy rudnigı.
24 nauryz – Jezqazǧan baiytu fabrikasy.
Al Jomart ken ornynda tekseru jalǧasuda.
19 nauryzda korporasiia Ūlytau oblysyndaǧy Şyǧys-Jezqazǧan kenışınde taǧy bır qaiǧyly oqiǧa oryn alǧanyn mälımdedı. №57 şahtada tauarlyq-materialdyq qūndylyqtardy tüsıru kezınde 1994 jyly tuǧan jūmysşy jük oqpany alaŋyndaǧy saŋylauǧa qūlap ketken. Ökınışke qarai, ol alǧan jaraqattarynyŋ saldarynan oqiǧa ornynda köz jūmdy.
Būǧan deiın, 17 aqpanda Ulytau oblysynda «Qazaqmys» rudnigınde apat bolyp, jetı jūmysşy qaza tapqan edı. 18 aqpanda olardyŋ denelerı tabylyp, oqiǧaǧa bailanysty qylmystyq ıs qozǧaldy. 5 nauryzda tergeu toby apattyŋ negızgı sebebı metan gazynyŋ jinaluy men elektr jabdyqtarynyŋ tūtanuy ekenın habarlady.
Prezident Qasym-Jomart Toqaev 20 aqpanda önerkäsıptık qauıpsızdık mäselesın synǧa alyp, Premer-ministr Oljas Bektenovke tiıstı şaralar qabyldaudy tapsyrǧan edı.
Ūqsas jaŋalyqtar
