«قازاقمىس» كورپوراتسياسى ءوز كەن ورىندارىندا قاۋىپتى ايماقتاردىڭ انىقتالۋىنا بايلانىستى ءوندىرىستى كەزەڭ-كەزەڭىمەن توقتاتاتىنىن مالىمدەدى، دەپ حابارلايدى “ادىرنا” ۇلتتىق پورتالى.
كومپانيانىڭ حابارلاۋىنشا، وندىرىستىك نىسانداردا جازاتايىم وقيعالاردىڭ جيىلەپ كەتۋى قاۋىپسىزدىك شارالارىن قايتا قاراۋدى تالاپ ەتىپ وتىر. وسىعان بايلانىستى بارلىق جوعارى قاۋىپ دەڭگەيى بار تەحنولوگيالىق ۇدەرىستەر ۋاقىتشا توقتاتىلىپ، بارلىق جۇمىس تۇرلەرىنە قاۋىپسىزدىك ەرەجەلەرىنىڭ ساقتالۋىنا جان-جاقتى تەكسەرۋ جۇرگىزىلەدى. تەك بارلىق بۇزۋشىلىقتار جويىلعاننان كەيىن عانا ءوندىرىس قايتا جاندانادى.
كومپانيا جوسپاردان تىس تەكسەرىس جۇرگىزىپ، ينجەنەرلىك-تەحنيكالىق قىزمەتكەرلەردى قايتا اتتەستاتسيادان وتكىزۋدى، جەراستى نىساندارىن قاداعالاۋدى جانە قۇتقارۋ جابدىقتارىنىڭ دايىندىعىن تەكسەرۋدى قولعا الادى. سونىمەن قاتار، قىزمەتكەرلەردىڭ ونەركاسىپتىك قاۋىپسىزدىك تەحنيكاسى مەن توتەنشە جاعدايلارداعى ارەكەت ەتۋ الگوريتمدەرىن ءبىلۋ دەڭگەيى باعالاناتىن بولادى.
كەلەسى ءوندىرىس ورىندارى ۋاقىتشا جابىلدى:
20 ناۋرىز – شىعىس-جەزقازعان، ابىز، ساياق، قوڭىرات رۋدنيكتەرى; نۇرقازعان، قاراعايلى، بالقاش بايىتۋ فابريكالارى جانە جوندەۋ-مەحانيكالىق باسقارماسى.
21 ناۋرىز – وڭتۇستىك-جەزقازعان، اقباستاۋ، حادجيقونعان، شاتىركول، جايسان رۋدنيكتەرى.
22 ناۋرىز – باتىس-جەزقازعان رۋدنيگى.
23 ناۋرىز – جىلاندى رۋدنيگى.
24 ناۋرىز – جەزقازعان بايىتۋ فابريكاسى.
ال جومارت كەن ورنىندا تەكسەرۋ جالعاسۋدا.
19 ناۋرىزدا كورپوراتسيا ۇلىتاۋ وبلىسىنداعى شىعىس-جەزقازعان كەنىشىندە تاعى ءبىر قايعىلى وقيعا ورىن العانىن مالىمدەدى. №57 شاحتادا تاۋارلىق-ماتەريالدىق قۇندىلىقتاردى ءتۇسىرۋ كەزىندە 1994 جىلى تۋعان جۇمىسشى جۇك وقپانى الاڭىنداعى ساڭىلاۋعا قۇلاپ كەتكەن. وكىنىشكە قاراي، ول العان جاراقاتتارىنىڭ سالدارىنان وقيعا ورنىندا كوز جۇمدى.
بۇعان دەيىن، 17 اقپاندا ۋلىتاۋ وبلىسىندا «قازاقمىس» رۋدنيگىندە اپات بولىپ، جەتى جۇمىسشى قازا تاپقان ەدى. 18 اقپاندا ولاردىڭ دەنەلەرى تابىلىپ، وقيعاعا بايلانىستى قىلمىستىق ءىس قوزعالدى. 5 ناۋرىزدا تەرگەۋ توبى اپاتتىڭ نەگىزگى سەبەبى مەتان گازىنىڭ جينالۋى مەن ەلەكتر جابدىقتارىنىڭ تۇتانۋى ەكەنىن حابارلادى.
پرەزيدەنت قاسىم-جومارت توقاەۆ 20 اقپاندا ونەركاسىپتىك قاۋىپسىزدىك ماسەلەسىن سىنعا الىپ، پرەمەر-مينيستر ولجاس بەكتەنوۆكە ءتيىستى شارالار قابىلداۋدى تاپسىرعان ەدى.
