Qazaqstan Ukrainaǧa Novorossiisk teŋız porty akvatoriiasynda halyqaralyq Kaspii qūbyr konsorsiumynyŋ asa maŋyzdy infraqūrylymyna baǧyttalǧan kezektı maqsatty şabuylǧa bailanysty resmi türde narazylyq bıldırdı, dep habarlaidy “Adyrna”.
Syrtqy ıster ministrlıgınıŋ resmi ökılı Aibek Smadiiarov Kaspii qūbyr konsorsiumyna jasalǧan şabuylǧa qatysty mälımdeme jasady.
Būl – halyqaralyq qūqyq normalarymen qorǧalatyn azamattyq nysanǧa qarsy jasalǧan üşınşı agressiialyq akt.
Qazaqstan jahandyq energetikalyq naryqtyŋ jauapty qatysuşysy retınde energiia resurstaryn tūraqty jäne üzdıksız jetkızudıŋ maŋyzdylyǧyn erekşe atap öttı.
«Osy oqiǧany Qazaqstan Respublikasy men Ukrainanyŋ ekıjaqty qatynastaryna zalal keltıretın äreket retınde baǧalaimyz jäne ukrain tarapy mūndai jaǧdailardyŋ qaitalanuyna jol bermeu üşın naqty şaralar qabyldaidy dep kütemız», – dedı Aibek Smadiiarov.
Eske salsaq, 29 qaraşada Ukrainanyŋ ekipajsyz katerlerı Novorossiiskıdegı Kaspii qūbyr konsorsiumynyŋ (KTK) teŋız terminalynyŋ ailaq qūrylǧysyn ısten şyǧarǧan bolatyn. Sonyŋ saldarynan mūnai tieu toqtatylǧan edı. Osy qūbyr arqyly mūnaiynyŋ basym bölıgın halyqaralyq naryqqa şyǧaratyn Qazaqstan bır kün būryn "mūnai tasymaldaudyŋ balama baǧyttaryn" qarastyrady degen.
