Su tasqyny bolǧan jaǧdaida 400 gidrotehnikalyq qūrylys (GTQ) 1,3 million qazaqstandyqqa qauıp töndıruı mümkın. Būl turaly Amanat partiiasy mälımdedı, dep habarlaidy “Adyrna” ūlttyq portaly.
«400 gidrotehnikalyq qūrylys su tasqyny kezınde 530-dan astam eldı mekendı su basu qauıpın tudyrady. Al onda 1,3 millionnan astam adam tūrady. Mysaly, Astana qalasynyŋ qorǧanys bögetın qaita qūru jūmystary 2020 jyldan berı jürgızılude, bıraq älı aiaqtalǧan joq. Partiialyq baqylau komitetınıŋ kezektı otyrysynda su tasqyny kezeŋıne daiyndyq jäne gidrotehnikalyq qūrylystardyŋ jai-küiı mäselelerı talqylandy», - dep habarlady seisenbı künı Amanat partiiasynyŋ baspasöz qyzmetı.
Aqparatqa säikes, qazırgı uaqytta elımızde su basu qauıpı bar 1223 eldı meken anyqtalǧan.
Respublika aumaǧynda 1395 gidrotehnikalyq qūrylys bar, olardyŋ 564-ı jöndeudı qajet etedı, onyŋ ışınde 20-y apattyq jaǧdaida tūr.
«Atbasar qalasynda ötken jyly ısten şyqqan su ötkızetın qūrylǧylar boiynşa jūmystar aiaqtalmady. Soltüstık Qazaqstan oblysynda bırneşe jyl boiy Esıl özenınıŋ arnasyn tereŋdetu jūmystary jürgızılmedı. Mūndai mysaldar elımızdıŋ är öŋırınde köp! Mūnda mäsele resurstardyŋ jetıspeuşılıgınde emes, baqylau men jauapkerşılıkte. Ötken jylǧy jaǧdai qaitalanbauy tiıs», - dedı Amanat partiiasynyŋ hatşysy Erjan Jylqybaev, aimaqtarda älı de şeşılmegen mäselelerdıŋ oryn alatynyn jäne olar kütpegen jaǧdailarǧa äkeluı mümkın ekenın atap ötıp.
Sonymen qatar, talqylau barysynda oblys äkımderı barlyq josparlanǧan su tasqynyna qarsy ıs-şaralardy qysqa merzımde jüzege asyru üşın keşendı şaralar qabyldauy keregı aityldy.
«Bırınşıden, su aǧatyn kanaldardyŋ, aryqtardyŋ jäne su būru jüielerınıŋ daiyndyǧyn qamtamasyz etu. Su basu qaupı bar eldı mekenderdıŋ barlyǧyn jaǧalap, joǧary sudyŋ keluınen qorǧau qajet», - delıngen habarlamada.
Būl tūrǧyda partiialyq baqylau posttarynyŋ tiımdı jūmysy ülken röl atqarady, dep esepteidı baqylau komitetınıŋ töraǧasy Pavel Kazansev.
«Kritikalyq jaǧdailarda eŋ qorqynyşty närse – būl dürbeleŋ. Al ol aqparattyŋ bolmauynan tuyndaidy. Ne bärı qaşyp ketedı de, qaza tabady, ne bärı jinalyp, bırlese jeŋedı! Är posttyŋ basşysy naqty belgılengen, qauıptılıkke bailanysty jergılıktı tapsyrmany oryndauy kerek – sonda būl basqaru bolady. Äitpese – būl bos söz», - dedı Kazansev.
Ol sondai-aq basty mäselelerdıŋ bırı GTQ-nyŋ tozuy, qarjylandyrudyŋ jetıspeuşılıgı jäne kommunaldyq menşıktegı obektılerdı paidalanuǧa jauapty ūiymdardyŋ jetıspeuşılıgı ekenın aitty. Qazırgı uaqytta mūndai ūiymdar 15, al 2024 jyly olar tek altau bolǧan.
«Qazgidromet mälımetterı boiynşa, su tasqyny qauıpı bar öŋırlerge Aqmola, Aqtöbe, Şyǧys Qazaqstan, Batys Qazaqstan, Qaraǧandy, Qostanai jäne Soltüstık Qazaqstan oblystary, sondai-aq Abai jäne Ūlytau oblystary jatady», - dep naqtylady partiia.
Tötenşe jaǧdailar vise-ministrı Batyrbek Äbdışev su tasqynymen küresu üşın 37 myŋnan astam jeke qūramnan tūratyn azamattyq qorǧanys küşterı men qūraldarynyŋ toby, 13 myŋnan astam tehnika men 20 ūşaq, sondai-aq 4096 su aidau jäne 640 jüzu kemelerı qūrylǧanyn atap öttı.
«Zardap şekken halyqty evakuasiialau üşın 2250 tehnika daiyn tūr. Jalpy, TJM küşterı men qūraldary joǧary daiyndyqqa keltırıldı. Jaǧdaiǧa qarai bız tötenşe jaǧdailardy joiu üşın jedel şaralar qabyldaimyz», – dedı Äbdışev.
Komitet Soltüstık Qazaqstan, Şyǧys Qazaqstan jäne Batys Qazaqstan oblystarynyŋ äkım orynbasarlarynyŋ baiandamalaryn tyŋdady, olar eldı mekenderdı qorǧau üşın qabyldanyp jatqan şaralar turaly habarlady.
«Otyrys nätijesınde komitet öŋırlerge su tasqynyna daiyndyqty jedel aiaqtaudy, gidrotehnikalyq qūrylymdardyŋ jaǧdaiyna qosymşa tekseruler jürgızudı, partiialyq baqylau aimaqtyq komissiialarynyŋ jūmysyn belsendırudı jäne su tasqyny qauıpı bar aimaqtardaǧy jaǧdaidy baqylaudy küşeitudı ūsyndy. Monitoring jürgızu jäne baqylau şaralaryn jüzege asyru jūmystaryna Amanat partiiasynyŋ mäslihat deputattaryn, erıktıler men qoǧamdyq belsendılerdı tartu qajet», - delıngen habarlamada.
