Memleket basshysy Qasym-Jomart Toqaev Qazaqstan halqyn Ramazan aıynyń bastalýymen quttyqtady, dep habarlaıdy "Adyrna" ulttyq portaly.
Aqorda taratqan aqparatta:
«Qurmetti otandastar! Barshańyzdy qasıetti Ramazan aıynyń bastalýymen quttyqtaımyn! Bul – halqymyzdyń rýhanı ómirinde aıryqsha mańyzy bar kezeń. Oraza kezinde sabyrlylyq pen qanaǵatshyldyq, janashyrlyq pen qamqorlyq sekildi izgi qundylyqtar erekshe dáripteledi. Azamattarymyz muqtaj jandarǵa kómek berip, qaıyrymdylyq jasaýǵa umtylady. Munyń bári ıslam dininiń gýmanıstik ıdeıalarynan bastaý alady. Halqymyz úshin din men dástúr – birin-biri tolyqtyryp, ózara sabaqtasyp jatqan egiz uǵym. Asyl dinimiz de, ata dástúrimiz de jurtty jaqsylyq pen jasampazdyqqa úndeıdi», — delingen quttyqtaý mátininde.
Ol bıyl Ramazan aıynyń Alǵys aıtý kúnimen tuspa-tus kelip otyrǵanyn da erekshe atap ótti.
«Munyń zor sımvoldyq máni bar. Mazmuny tereń, maǵynasy úndes qos mereke halqymyzdyń berekeli birligin odan ári nyǵaıta túsýge shaqyrady. Orazadan-orazaǵa aman-esen jete bereıik! Barshańyzǵa baq-bereke tileımin! Nıet qabyl bolsyn!», — dedi ol.
