Astanada salynatyn LRT (jeńil relsti kólik) júıesiniń alǵashqy vagondary Qytaıdyń Tanshan qalasynda qurastyrylyp jatyr. City Transportation Systems (CTS) kompanııasynyń málimetinshe, birinshi partııada 19 jyljymaly quramǵa tapsyrys berilgen, dep habarlaıdy "Adyrna" ulttyq portaly.
Uzyndyǵy 60 metr bolatyn bul poıyzdar GOA 4 deńgeıindegi avtomattandyrylǵan basqarý júıesimen jabdyqtalady. Bul júıe esikterdiń avtomatty ashylýy men jabylýyn, toqtaý jáne jyldamdyqty retteýdi, depoǵa kirý jáne shyǵýdy, poıyzdardyń jaǵdaıyn baqylaýdy, qashyqtyqty retteýdi qamtamasyz etedi.
Qazirgi ýaqytta vagon korpýstary alıýmınıı qorytpasynan jasalyp, dánekerleý jumystary júrgizilýde. Kompanııa ókilderiniń aıtýynsha, alǵashqy poıyzdar mamyr aıynyń sońyna deıin daıyn bolmaq.
CTS basqarýshy dırektory Orynbasar Aǵybaev qyrkúıek aıynda vagondar Astanaǵa jetkizilgennen keıin synaq kezeńi bastalatynyn atap ótti.
"Testilik iske qosý – paıdalanýǵa berýdiń mańyzdy kezeńi. Bul synaqtar birneshe aıǵa sozylady, onyń nátıjesinde LRT júıesin tolyq iske qosý týraly sheshim qabyldanady", – deıdi ol.
LRT júıesiniń alǵashqy testilik iske qosylýy 2024 jyldyń qyrkúıek aıyna josparlanǵan.
