Májilis SMM mamanyn izdeýge qatysty habarlandyrý jarııalap, onda orys tilin jetik meńgergen úmitkerlerge basymdyq beriletinin kórsetken. Bul talap áleýmettik jelilerde qyzý talqyǵa túsip, qoǵam arasynda úlken rezonans týdyrdy, dep habarlaıdy "Adyrna" ulttyq portaly.
Jurtshylyq memlekettik mekemeniń memlekettik tilge basymdyq bermeýin synǵa aldy, óıtkeni Qazaqstan Respýblıkasynyń Konstıtýııasy boıynsha qazaq tili – memlekettik til.
Jarııalanǵan habarlandyrýda bolashaq qyzmetkerdiń Májilistiń áleýmettik jelilerin júrgizýi tıis ekeni aıtylǵan. Alaıda talaptar qatarynda orys tilinde saýatty jazý mindettelgenimen, qazaq tilin bilý tek qosymsha artyqshylyq retinde kórsetilgen.
"Kimdi kútemiz? Osy salada keminde 1 jyldyq tájirıbesi bar; grafıkalyq qosymshalarmen jáne SMM-niń zamanaýı quraldarymen, sonyń ishinde neırojelilermen jumys isteı alatyn; orys tilinde saýatty jaza biletin; qazaq tilin bilýi qosymsha artyqshylyq bolyp sanalatyn; analıtıkalyq quraldarmen jumys istep, Facebook pen Telegram-da jyljytý strategııasyn jasaı alatyn maman qajet" – dep jazylǵan edi.
Keıinnen bul habarlandyrý jumys izdeý platformasynan óshirilgen. Qoǵam belsendileri men jeli qoldanýshylary memlekettik tildiń mártebesi eskerýsiz qalmaýy tıis ekenin alǵa tartyp, bılik ókilderinen bul máselege naqty jaýap berýdi talap etýde.
